Bakı, 7 mart, N.Məmmədova, AZƏRTAC

Gürcüstan-Azərbaycan-Türkiyə üçtərəfli regional əməkdaşlıq formatının məqsədi regional layihələrin təhlükəsizliyini və effektivliyini təmin etməkdir. Ermənistanın bu formata qoşulması ona bizim dövrdə hər şeydən vacib olan rahatlıq verə bilər.

Gürcüstanlı siyasi analitik, “Novosti s Kavkaza” yutub-kanalın müəllifi Gela Vasadze bu fikrini AZƏRTAC-la bölüşüb.

Məlum olduğu kimi, martın 6-da Tbilisidə Gürcüstan, Azərbaycan və Türkiyə parlamentlərinin xarici əlaqələr komitələrinin rəhbərlərinin görüşü olub. Tərəflər Cənubi Qafqazda sülh və sabitlik üçün regional əməkdaşlığın dərinləşdirilməsi məsələsini, regionun kommunikasiya funksiyasını, Bakı-Tbilisi-Ceyhan neft kəməri, Bakı-Tbilisi-Qars dəmir yolu, Cənub Qaz Dəhlizi, Orta Dəhliz kimi tranzit dəhlizlərin, həmçinin Qara dəniz sualtı kabel layihəsinin vacibliyini müzakirə ediblər.

Agentliyin müsahibi deyib: “Burada hər şey sadə və aydındır: hər üç ölkə onların iqtisadiyyatının və milli təhlükəsizliyinin mühüm hissəsi olan regional logistik və enerji layihələrinin təhlükəsizliyini və effektivliyini təmin etməlidir. Burada milli təhlükəsizlik məsələsi birinci dərəcəlidir. Biz bu layihələrin həyata keçirilməsində müxtəlif mənada maraqlıyıq: Türkiyə üçün qarşılıqlı əlaqəli çoxsaylı layihələrdən biri, Gürcüstan və Azərbaycan üçün sistemyaradıcı layihələrdir”.

G.Vasadzenin sözlərinə görə, siyasi mənada bu, ölkələrimizin təhlükəsizliyinin möhkəmlənməsi deməkdir. Bu isə indiki dolaşıq zəmanədə heç də az əhəmiyyət kəsb etmir. Ekspert vurğulayıb ki, Türkiyə və Gürcüstan “Ramştayn” klubunun üzvləridir, Azərbaycan Qoşulmama Hərəkatında fəal iştirak edir, hər üç ölkə ən müxtəlif beynəlxalq formatların iştirakçılarıdır. Bu, onların bir-birini dəstəkləmək imkanlarını əhəmiyyətli dərəcədə genişləndirir.

G.Vasadze “Gələcəkdə - Ermənistanın Azərbaycan və Türkiyə ilə münasibətləri normallaşandan sonra o da bu formata qoşula bilərmi və bu halda onun qazancı nədən ibarət olacaq?” sualına cavab olaraq bildirib ki, belə imkan var, lakin həmin imkan yalnız adıçəkilən ölkələrlə bağlı problemlər həll ediləndən sonra gerçəkləşə bilər. Siyasi analitik vurğulayıb: “Mən bunu çox istərdim. Lakin təəssüf ki, hələlik bu istiqamətdə perspektiv görmürəm. Daha doğrusu, perspektivi gələcəkdə görürəm. Bugünkü vəziyyətdə münasibətlərin tam normallaşması mümkün deyil. Lakin bizi yalnız xoşagələn faktlarla heyrətləndirmək olar, ona görə ən yaxın vaxtda heyrətlənəyəcəyimizə ümid edirəm. Sualınızın ikinci hissəsinə gəldikdə, Ermənistan bu formata qoşulacağı təqdirdə o, bizim dövrdə hər şeydən vacib olan rahatlıq qazana bilər”.