Gəncə Körpələr Evinin balaca sakinlərinin bayram sevinci
Bakı, 1 iyun, AZƏRTAC
1 İyun - Uşaqların Beynəlxalq Müdafiəsi Günündə “Kimsəsiz Uşaqların Sosial Müdafiəsi” İctimai Birliyinin sədri Lamiyə İsazadə, Gəncə Gənclər Evinin rəhbəri Amil Qurbanov və digər xeyriyyəçi şəxslər Gəncə Körpələr Evindəki valideyn himayəsindən məhrum olan körpələri ziyarət ediblər.
İctimai Birlikdən AZƏRTAC-a bildiriblər ki, körpələrlə görüşdə birliyin sədri Lamiyə İsazadə çıxış edərək, Uşaqların Beynəlxalq Müdafiəsi Gününün yaranma tarixindən danışıb. Qeyd edilib ki, bütün demokratik dövlətlərdə olduğu kimi, Azərbaycanda da uşaq hüquqlarının qorunmasına xüsusi önəm verilir, uşaqların sağlam, hərtərəfli, Vətənə layiqli övladlar kimi böyümələri üçün hər cür şərait yaradılıb. Azərbaycanda uşaq problemləri hər zaman diqqət mərkəzindədir. Uşaq problemlərinin ardıcıl həlli dövlət siyasətinin prioritet istiqamətlərindən biridir.
Bu gün Azərbaycan uşaqlarının sağlam mühitdə böyüməsi və tərbiyə olunması, müvafiq standartlara cavab verən təhsil müəssisələrində oxuması üçün dövlətimizdə hər cür şərait yaradılıb.
Vurğulanıb ki, ölkəmizdə uşaqların müdafiə olunması və onlara qayğı göstərilməsi istiqamətində çoxsaylı işlər görülüb. Uşaqların sosial və hüquqi müdafiəsi ilə bağlı məsələlər Konstitusiya, qanunverici və normativ-hüquqi aktlarla tənzimlənir. Bu sahədə əsas normativ sənəd 1998-ci il mayın 19-da qəbul edilmiş “Uşaq Hüquqları haqqında” Azərbaycan Respublikasının Qanunudur.
Çıxışlarda bildirilib ki, ümummilli lider Heydər Əliyev uşaqlara dövlət səviyyəsində qayğını həmişə diqqətdə saxlayırdı. Ölkəmizdə indi də uşaqlara qayğı ildən-ilə artır, uşaq problemlərinin həlli istiqamətində müxtəlif layihələr həyata keçirilir. Bu, Heydər Əliyev Fondunun da əsas prioritetlərindən biridir. Azərbaycanın Birinci vitse-prezidenti Mehriban xanım Əliyeva xüsusi qayğıya ehtiyacı olan, valideyn himayəsindən məhrum olan uşaqlara daim diqqət və qayğı ilə yanaşır, bu nəcib missiyası ilə bütün Azərbaycan uşaqlarının ən böyük dostu və ən böyük himayədarıdır.
Sonra Gəncə Körpələr Evinin balaca sakinlərinə bayram hədiyyələri verilib.
Lamiyə İsazadə aksiyaya dəstək verən şəxslərə minnətdarlığını bildirib və bu cür tədbirlərin davamlı təşkil olunacağını diqqətə çatdırıb.
Bölmənin digər xəbərləri
