GƏNCƏDƏ BEYNƏLXALQ PROQRAMIN 25 İLLİK YUBİLEYİ QEYD OLUNMUŞDUR
Bununla əlaqədar, əmək və əhalinin sosial müdafiəsi nazirinin müavini Tahir Budaqovun və BQXK-nın Bakı nümayəndəliyinin rəhbəri xanım Meri Verntsin iştirakı ilə Ortopedik Bərpa Mərkəzinin Gəncə filialında tədbir keçirilmişdir. Tədbirdə silahlı münaqişələrdə zərər çəkmiş insanların humanitar ehtiyaclarının ödənilməsi istiqamətində BQXK-nın geniş fəaliyyətindən bəhs olunmuşdur.
“Fiziki reabilitasiya proqramı” üzrə indiyədək dünyada 300 mindən çox insan protez və ortozlarla təmin edilmişdir.
BQXK-nın Azərbaycandakı fəaliyyətindən danışan natiqlər, bu proqramın 1994-cü ildən Əmək və Əhalinin Sosial Müdafiəsi Nazirliyi ilə birgə həyata keçirildiyini bildirmişlər. Ötən 10 il ərzində əlillərin reabilitasiyası, protez-ortopedik vasitələrlə təmin olunması, Naxçıvanda və Gəncədə protez mərkəzlərinin yaradılması və müasir avadanlıqla təchizatı, protezləşdirmə üzrə mütəxəssislərin hazırlanmasında BQXK yaxından yardım etmişdir. BQXK-nın proqramının dəstəyi ilə yaradılmış mərkəzlərdən biri də Əmək və Əhalinin Sosial Müdafiəsi Nazirliyinin Ortopedik Bərpa Mərkəzinin Gəncə filialı və yubiley tədbirinin də Gəncədə keçirilməsinin bununla əlaqədar olduğu bildirilmişdir.
Sonra tədbir iştirakçıları Gəncə filialının fəaliyyəti ilə yaxından tanış olmuşlar.
