Gəncədə “Gənclər arasında sahibkarlığın inkişaf etdirilməsi” mövzusunda tədbir keçirilib
Gəncə, 13 dekabr, Elcan Məmmədov, AZƏRTAC
Gəncə-Daşkəsən Regional Mədəniyyət İdarəsinin dəstəyi, Gəncə şəhər Heydər Əliyev Mərkəzinin təşkilatçılığı ilə “Heydər Əliyev İli” çərçivəsində “2015-2025-ci illərdə Azərbaycan gənclərinin İnkişaf Strategiyası”nın təsdiq edilməsi haqqında Azərbaycan Respublikası Prezidentinin Sərəncamı ilə əlaqədar “Gənclər arasında sahibkarlığın inkişaf etdirilməsi” mövzusunda panel tədbir keçirilib.
Mərkəzdən AZƏRTAC-ın bölgə müxbirinə verilən məlumata görə, Gəncə şəhər Heydər Əliyev Mərkəzində keçirilən tədbirdə Azərbaycan Texnologiya Universitetinin, Azərbaycan Dövlət Aqrar Universitetinin, Gəncə Dövlət Universitetinin və Ticarət və Xidmət üzrə Gəncə Dövlət Peşə Təhsil Mərkəzinin tələbələri iştirak ediblər. Tədbirdən əvvəl Ulu Öndər Heydər Əliyevin və şəhidlərin xatirəsi bir dəqiqəlik sükutla yad olunub.
Çıxış edən Gəncə şəhər Heydər Əliyev Mərkəzinin direktoru vəzifəsini icra edən İlknur İsgəndərova Strategiyanın məqsəd və vəzifələrindən bəhs edərək bildirib ki, 2015-2025-ci illəri əhatə edən müddətdə Azərbaycan gəncliyinin potensialını müasir dövrün tələblərinə uyğun inkişaf etdirmək, həmin potensialdan Azərbaycan Respublikasının mənafeləri naminə istifadə etmək, yeni nəsildə fəal vətəndaşlıq mövqeyi formalaşdırmaqdır.
Gəncə-Daşkəsən Regional Mədəniyyət İdarəsinin rəisi vəzifəsini icra edən Pərvin Kazımov “Yaradıcı və istedadlı gənclər”, KOBİA-nın Gəncə-Qazax Regional Koordinatorluğunun koordinatoru Anar Əliyev “Biznesə başlamaq istəyənlərə, startaplara, sahibkarlara keçirilən təlimlər, məsləhət və mentorluq xidmətləri”, Gəncə Regional Turizm İdarəsinin rəisi Zaur Bayramov “Turizmin inkişafında region gənclərinin rolunun artırılması” və Gəncə-Daşkəsən Regional Məşğulluq Filialının şöbə müdiri Pərviz Əliyev “Gənclərin məşğulluğunun təmin edilməsi” mövzularında çıxış ediblər.
Ölkəmizdə sahibkarlığın inkişafına göstərilən dəstək tədbirləri, gənclər arasında sahibkarlığın təşviqi, bu istiqamətdə həyata keçirilən layihələrin əhəmiyyəti, sahibkarlığa marağı olan gənclərin bilik və bacarıqlarının artırılması, gənclərin müasir əmək bazarının çağırışlarına adaptasiyası, onların potensialının üzə çıxarılması və təşəbbüslərinin dəstəklənməsi istiqamətində atılan addımlar barədə məlumat verilib.
Tədbir müzakirə formasında davam edib. Gənclərin fikirləri dinlənilib, sualları cavablandırılıb və onlara tövsiyələr verilib.
Bölmənin digər xəbərləri
