GƏNCLƏR ARASINDA SAĞLAM HƏYAT TƏRZİNİN TƏBLİĞİNƏ HƏSR OLUNMUŞ YÜRÜŞ KEÇİRİLMİŞDİR
AZƏRTAC xəbər verir ki, Bakı Şəhər Gənclər və İdman Baş İdarəsinin təşkilatçılığı, Milli Olimpiya Komitəsinin, Gənclər və İdman Nazirliyinin, Bakı Şəhər İcra Hakimiyyətinin dəstəyi ilə gənclər arasında sağlam həyat tərzinin təbliğinə həsr olunmuş yürüş keçirilmişdir.
“Park İNN - Azərbaycan” mehmanxanasının qarşısından başlanmış yürüşdə veteran idmançılar, paralimpiyaçılar, müxtəlif federasiyaların və klubların nümayəndələri iştirak etmişlər.
Bakı şəhər gənclər və idman baş idarəsinin rəisi Raqif Abbasov demişdir ki, aksiya ilə biz gəncləri narkomaniya, pis vərdişlərdən uzaqlaşmağa, onlar arasında sağlam həyat tərzininin təbliğinə çağırırıq. Aksiyada iştirak edən 400 nəfərə yaxın adam bu yürüşlə gənclərə, idmanımıza göstərdiyi diqqət və qayğıya görə dövlətə özünəməxsus şəkildə minnətdarlığını bildirməyə çalışır. Eyni zamanda biz bununla 1993-cü ildə xalqın ağır günlərində yenidən hakimiyyətə gələrək ümumxalq səsverməsi nəticəsində ümummilli lider Heydər Əliyevin ölkə prezidenti seçilməsinin 18-ci ildönümünü qeyd edirik.
Yürüş dövlət bayraqları ilə təchiz olunmuş aksiya iştirakçılarının Rəşid Behbudov küçəsi ilə Heydər Əliyev adına Sarayın qarşısındakı parka gələrək ulu öndərin heykəli önünə əklil qoyması ilə başa çatdı.
Bölmənin digər xəbərləri
