Gənclər Fondunun Müşahidə Şurasının onlayn iclası keçirilib
Bakı, 7 may, AZƏRTAC
Mayın 7-də Azərbaycan Respublikasının Gənclər Fondunun Müşahidə Şurasının cari ildəki ikinci iclası onlayn formatda keçirilib.
Fonddan AZƏRTAC-a bildiriblər ki, iclasda Müşahidə Şurasının gündəliyində duran məsələlər müzakirə edilib, hazırda bu qurum tərəfindən həyata keçirilən “İdeyanı reallaşdır - gənclərin fərdi layihələri üzrə qrant müsabiqəsi”nə mayın 1-dək daxil olmuş layihə təkliflərinə baxılıb. Xüsusi karantin dövrünü gənclər üçün faydalı və əyləncəli etmək məqsədilə elan edilmiş müsabiqə çərçivəsində gənclər “#evdəqal” çağırışına uyğun olaraq sosial şəbəkələrdə virtual çağırış və təşviqetmə aksiyaları, sosial şəbəkə və paylaşım platformalarında əyləncəli kontentlərin yaradılması, faydalı və maarifləndirici videoçarxların hazırlanması və digər onlayn icrası mümkün təşəbbüslərini təqdim etmək imkanı əldə ediblər.
Təqdim edilən layihələr Müşahidə Şurası tərəfindən nəzərdən keçirilib, seçim meyarlarına cavab verən layihələr müəyyənləşdirilib. Onların onlayn şəraitdə icra imkanı, icra planı, büdcəsi və icra müddətinin müəyyən edilməsi məqsədilə Fonda layihə müəllifləri ilə əlaqə saxlanılması tapşırılıb.
Eyni zamanda, gənclər təşkilatları üçün elan edilmiş 14-cü qrant müsabiqəsinə təqdim olunan layihələrin mövcud vəziyyətə uyğunlaşdırılaraq icrası imkanlarının araşdırılması məqsədilə Gənclər Fondu tərəfindən təşkilatlarla müzakirələrin təşkilinə dair tapşırıq verilib.
İclasda, həmçinin pandemiya dövründə dövlət tərəfindən həyata keçirilən tədbirlərdə fəal iştirakla bağlı Azərbaycan Respublikası Prezidentinin çağırışına cavab olaraq, könüllü təşkilat və hərəkatları tərəfindən martın 27-də təsis edilmiş Azərbaycan Könüllülərinin Əlaqələndirmə Mərkəzinin (AKƏM) fəaliyyəti ilə bağlı təqdimat keçirilib. Qeyd olunub ki, hazırda 18 könüllü təşkilatı və hərəkatını özündə birləşdirən Mərkəz üzvləri arasında əlaqələndirməni həyata keçirməklə fəaliyyətin səmərəliliyinin artırılması funksiyasını daşıyır. Üzvlərin qərarına əsasən Mərkəzin katibliyi Gənclər Fondunda yerləşir. Təsis edildiyi dövrdən etibarən AKƏM çərçivəsində “Böyüklərimizi qoruyaq”, “Könüllü qonşu” və “Könüllü donor” aksiyaları ölkənin 50-dən artıq şəhər və rayonunda 4 minə yaxın könüllünün iştirakı ilə keçirilməkdədir. AKƏM-in hazırkı fəaliyyəti əsas etibarilə yeni növ koronavirus infeksiyasının yayılmasının qarşısının alınması istiqamətində dövlət tərəfindən atılan addımlara dəstək vermək, ahıl və kimsəsiz vətəndaşlara yardım etmək, bu sahədə dövlət qurumlarına kömək göstərməkdən ibarətdir.
Gənclər Fondunun Xaricdə Təhsil Proqramı çərçivəsində hazırda təhsillərini davam etdirən tələbələrlə bağlı müzakirələrdə bildirilib ki, Fond tərəfindən tələbələrlə mütəmadi əlaqə saxlanılır və onların təhsil prosesi yaxından izlənilir. Xaricdə Təhsil Proqramı çərçivəsində ABŞ, Almaniya, Böyük Britaniya, Fransa, İtaliya, İspaniya, İsveç, Niderland, Norveç və Rusiyanın aparıcı universitetlərində gənclərin təhsil alması dövlət tərəfindən dəstəklənir.
İclasda COVID-19 virusunun yayılmasının qarşısının alınması ilə bağlı icrasına aprelin 10-da Fond və UNICEF-in Azərbaycandakı nümayəndəliyi tərəfindən birgə başlanılmış “Gənclər üçün koronavirusla bağlı ictimai maarifləndirmə” layihəsi ilə bağlı təqdimat keçirilib. Qeyd olunub ki, layihə çərçivəsində sosial platformalardan istifadə etməklə müxtəlif tipli media məhsulları vasitəsilə ictimaiyyətin maarifləndirilməsi, habelə sosial təcrid vəziyyətində mümkün psixoloji gərginliyin azaldılması ilə bağlı tədbirlərin həyata keçirilməsi, təlim materiallarını yaymaqla təhsilin davam etdirilməsi, gənclər üçün multimedia məzmunlu əyləncə, karantin zamanı valideynin davranış qaydaları haqqında məlumatlandırma və s. proqramlar həyata keçirilir.
İclasda post-pandemiya dövründə Gənclər Fondunun fəaliyyətinin əsas istiqamətləri üzrə də müzakirələr aparılıb. İnfeksiyanın geniş yayılmasının qarşısının alınması, əhalinin sağlamlığının qorunması, karantin rejiminin tətbiqi nəticəsində zərər çəkən əhali qruplarının və biznes sahələrinin müdafiəsi üzrə Azərbaycan Respublikasının Prezidenti İlham Əliyevin rəhbərliyi ilə dövlət qurumları tərəfindən təsirli tədbirlərin həyata keçirilməsinin bu dövrün tezliklə başa çatacağına, ölkəmizin sosial-iqtisadi inkişafının əvvəlki templərlə davam edəcəyinə əminlik yaratdığı qeyd olunub. Gənclər Fondunun gələn aylar üçün fəaliyyət planında bu amilin nəzərə alınmasının zəruriliyi vurğulanıb.
Bölmənin digər xəbərləri
