GƏNCLƏR ORDUDA XİDMƏTƏ HƏVƏSLƏ GEDİRLƏR
AzərTac-ın müxbiri xəbər verir ki, Goranboyda gənclərin növbəti həqiqi hərbi xidmətə yola salınma mərasimi olmuşdur. Mərasim iştirakçıları əvvəlcə şəhidlərin abidəsi önünə əklil və gül dəstələri qoymuşlar. Rayonun hərbi komissarı, polkovnik-leytenant Kamil Hüseynov çağırışçı gənclərə xoş arzularını və tövsiyələrini bildirdikdən sonra rayon ağsaqqalları, valideynlər çıxış etmişlər. Qeyd olunmuşdur ki, Qarabağ müharibəsində iştirak edən 2200 goranboyludan 286 nəfəri qəhrəmancasına həlak olmuş, 117 nəfər əlil olmuşdur. 9 nəfər Azərbaycanın Milli Qəhrəmanı adına, 10 nəfər isə müxtəlif orden və medallara layiq görülmüşdür. Çağırşçı gənclərin nümayəndələri həmyerlilərinin yolunu layiqincə davam etdirəcəklərinə, onların qəhrəmanlığından nümunə götürəcəklərinə söz vermiş, müqəddəs Vətən bayrağını öpərək, hərbi hissələrə yola düşmüşlər.
