Gənclər və yeniyetmələr arasında “Nə? Harada? Nə vaxt?” onlayn intellektual yarışı keçiriləcək
Bakı, 1 may, AZƏRTAC
Bakı Şəhər Gənclər və İdman Baş İdarəsi (BŞGİBİ) və “Xəzər” gənclərin intellektual klubunun birgə təşkilatçılığı ilə gənclər və yeniyetmələr arasında mayın 2-də “Nə? Harada? Nə zaman?” onlayn intellektual yarışı keçiriləcək.
AZƏRTAC xəbər verir ki, Gənclər və İdman Nazirliyinin təşəbbüsü ilə keçiriləcək yarışda iştirak etmək üçün indiyədək 52 komanda qeydiyyatdan keçib. Hər komandanın tərkibi 8 nəfərdən ibarətdir. Komandalar “WhatsApp” vasitəsilə müzakirə aparıb verilən sualı 1 dəqiqə ərzində cavablandıraraq müəyyən edilmiş linkə göndərəcəklər.
Komandaların tərkibində Azərbaycanın işğal altındakı rayonlarından olan yeniyetmə və gənclər də təmsil olunurlar. İntellektual yarışda suallar ümumi olaraq dünyagörüşü, məntiq, tarix, idman, təhsil, hərbi vətənpərvərlik və s. sahələri əhatə edir.
Yarışın qalibləri karantin dövrü bitdikdən sonra BŞGİBİ tərəfindən müvafiq dərəcəli diplomlar və xatirə hədiyyələri ilə təltif olunacaqlar.
Bölmənin digər xəbərləri
