GƏNCLİYƏ YARDIM FONDU NÖVBƏTİ XEYRİYYƏ TƏDBİRİ KEÇİRMİŞDİR
Tədbir çərçivəsində 150 aztəminatlı ailəyə və müxtəlif kateqoriyalardan olan əlillərə ərzaq yardımı göstərilmişdir. Yardıma ehtiyacı olan ailələrin siyahısı əlaqədar qeyri-hökumət təşkilatları tərəfindən əvvəlcədən müəyyənləşdirilmiş və fondun humanitar yardımlar şöbəsinə təqdim olunmuşdur.
Bu məqsədlə təşkil olunmuş tədbirdə GYF-in prezidenti Ahmet Tecim çıxış edərək bildirmişdir ki, fond Azərbaycan xalqının problemləri ilə həmişə maraqlanmış və ehtiyacı olan insanlara yardım əli uzatmışdır. Fondun fəaliyyəti yalnız yardımlarla bitmir. O, azərbaycanlı gənclər üçün təmənnasız ingilis, ərəb dilləri və kompyuter kursları da təşkil etmişdir. Bu kursları bitirənlərə sertifikatlar verilir. Fond təxminən 10 min ədəbiyyatı olan kitabxananı da istifadəyə vermişdir.
Tədbirdə Almaniyadan gəlmiş Dəniz Fənəri Dərnəyinin nümayəndəsi də çıxış edərək, GYF-ə və bu yardım proqramında iştirak edən əlaqədar qurumlara təşəkkürünü bildirmişdir.
1994-cü ildə yaranmış GYF belə tədbirləri özü maliyyəşdirməklə yanaşı, başqa ölkələrdə bu sahədə fəaliyyət göstərən qurumlarla da birgə layihələr həyata keçirir. Bununla, istər Türkiyədəki, istərsə də Avropadakı humanitar yardım təşkilatlarının diqqətini Azərbaycana yönəltməyə çalışır. Bu yardım çərçivəsində həm Avropada, həm də Türkiyədə tez-tez çox geniş yardım fəaliyyəti həyata keçirmiş Dəniz Fənəri Dərnəyi ilə birgə işləyir.
Tədbirin sonunda aztəminatlı ailələrə və əlillərə ərzaq bağlamaları paylanmışdır.
