İQTİSADİYYAT
Gergeli Naqi: Azərbaycanı biznesimiz üçün strateji ölkə hesab edirik
Bakı, 13 aprel (AZƏRTAC). Bizim üçün “CATEF” sərgisində iştirak etmək çox vacibdir, çünki biz bütün Azərbaycanı biznesimiz üçün strateji bir ölkə hesab edirik. Biz yalnız su təchizatı sahəsində fəaliyyət göstərmək niyyətində deyilik, bu gün biz artıq neft-qaz sahəsində əməkdaşlıq imkanlarını da nəzərdən keçiririk.
Bu sözləri İteca Caspian şirkətinin təşkilatçılığı ilə Bakıda keçirilən “CATEF 2013” sərgisində iştirak edən “Dow Water & Process Solutions” şirkətinin Regional kommersiya məsələləri üzrə meneceri AZƏRTAC-a müsahibəsində demişdir.
O bildirmişdir ki, “CATEF-2013” I Xəzər Beynəlxalq su texnologiyaları sərgisində dünyanın ən böyük kimya şirkətlərindən biri, rasional və ekoloji cəhətdən zərərsiz sutəmizləmə texnologiyaları sahəsində lider olan “Dow Water & Process Solutions” şirkəti süzgəc (US) sahəsində ən son innovasiyanı - 102 kvadrat metrlik “IntegraFlo” modulunu təqdim etmişdir.
“Dow” şirkətinin “IntegraFlo” modulları üzrə istehsal xətti ultrasüzgəc sahəsində ən mükəmməl yeni ixtiralardan birdir. Bu modul ümumi sutəmizləmə xərclərini azaltmağa çalışan sənaye sahəsinə “Dow” şirkətinin verdiyi daha bir töhfədir. Geniş səthi olan “IntegraFlo” modulları kapital xərclərə nəzərəçarpacaq dərəcədə qənaət etməyə imkan verir.
Bizi, Avropa, Asiya, Avstraliya və Amerikada yaxşı tanıyırlar. Şirkətin ticarət dövriyyəsi 60 milyard dollara çatmışdır və onun 58 ölkədə yerləşən 133 müəssisəsində 60 min nəfərə yaxın işçi çalışır. Həmçinin, 160 ölkədə şirkətimizin nümayəndəlikləri fəaliyyət göstərir. Bizim ultrafsüzgəc modullarımız yenilikçi məhsullar təklif etməklə bazarın tələbatlarına necə operativ münasibət göstərməyimizə parlaq nümunədir. Ötən il biz Ceyranbatan su anbarı üçün modulların təchizi üzrə tenderin qalibi olaraq Bakı əhalisinin yarısı üçün su təchizatını təmin etdik.