GORANBOYDA YENİ İNCƏSƏNƏT MƏKTƏBİ İSTİFADƏYƏ VERİLMİŞDİR
ABŞ-ın “CHF” humanitar təşkilatı tərəfindən Goranboy şəhərində inşa olunmuş 7 illik uşaq incəsənət məktəbinin binası istifadəyə verilmişdir. Məktəb 25 sinif otağından və geniş konsert zalından ibarətdir. Kompleksin tikintisinə və avadanlıq alınmasına 26 min Abş dolları məbləğində vəsait xərclənmişdir. Bunun 50 milyon manatını rayonun mədəniyyət işçiləri daxili imkanları hesabına, 30 milyon manatını isə rayon icra hakimiyyəti ödəmişdir.
Mədəniyyət Nazirliyinin mətbuat xidmətindən AZƏRTAC-ın müxbirinə bildirmişlər ki, yeni məktəbin açılış mərasimində nazir Polad Bülbüloğlu, rayonun rəsmi şəxsləri və ictimaiyyətin nümayəndələri çıxış edərək, bu işdə əməyi olanların hamısına təşəkkürlərini bildirmiş, Prezident Heydər Əliyevin rəhbərliyi altında respublikamızda həyata keçirilən quruculuq işlərindən, dövlətimizin başçısının ölkəmizdə mədəniyyət və incəsənətin inkişafına göstərdiyi diqqət və qayğıdan danışmış, bu cür xeyirxah işləri Azərbaycanda xarici sərmayədarlar üçün yaradılmış əlverişli şəraitin nəticəsi kimi qiymətləndirilmişlər.
Rayonda gənc nəslin estetik tərbiyəsi işində fərqlənənlərin, habelə yeni məktəb binasının tikintisində fəal iştirak edənlərin bir qrupuna pul mükafatı, təhsil ocağına isə musiqi alətləri və qiymətli hədiyyələr bağışlanmışdır.
Sonra mərasim iştirakçıları sinif otaqlarına baxmış, tədrisin vəziyyəti ilə tanış olmuşlar. İncəsənət məktəbinin şagirdləri konsert proqramı ilə çıxış etmişlər.
Bölmənin digər xəbərləri
