GÖRKƏMLİ İDMANÇININ YUBİLEYİ
Gənclər, İdman və Turizm Nazirliyinin fəaliyyətində başlıca istiqamətlərdən biri də veteran idmançılara diqqət və qayğı göstərilməsidir. Noyabrın 20-də Bədən Tərbiyəsi Akademiyasında boks üzrə idman ustası, Azərbaycanın əməkdar məşqçisi, beynəlxalq dərəcəli hakim Boris Kipianinin 70 illik yubileyinin qeyd olunması məhz veteranlara bu cür münasibətin nümunəsidir.
Akademiyanın rektoru, Azərbaycan Boks Federasiyasının prezidenti Ağacan Abiyev tədbirdə çıxış edərək, yubilyarın xidmətlərindən danışdı və bildirdi ki, Boris Kipiani boks üzrə gənclər arasında SSRİ çempionu, ali məktəb tələbələri arasında keçirilən yarışların qalibi olmuşdur. O, 1961-ci ildən Azərbaycanın boks üzrə yığma komandasının baş məşqçisi kimi çalışmışdır. Ahıl yaşda olmasına baxmayaraq, bu gün də pedaqoji və ictimai fəaliyyətdən kənarda qalmır, Azərbaycan Dövlət Neft Akademiyasının bədən tərbiyəsi kafedrasının dosentidir, Bakıdakı gürcü diasporunun fəal üzvüdür.
Gənclər, idman və turizm nazirinin birinci müavini Vaqif Əliyev, Gürcüstanın Azərbaycandakı səfiri Zurab Qumberidze də əlamətdar yubiley münasibətilə Boris Kipianıni təbrik etdilər.
Bölmənin digər xəbərləri
