Göygöldə silsilə oğurluq edən şəxslər saxlanılıb
Bakı, 3 avqust, AZƏRTAC
Göygöl rayonunun Çaykənd kəndi ərazisində yerləşən mağazalardan, fərdi yaşayış evlərindən və avtomobildən silsilə oğurluqlar etməklə zərərçəkmişlərə xeyli miqdarda maddi ziyan vuran iki nəfər rayon polis şöbəsi əməkdaşlarının keçirdikləri uğurlu əməliyyat-axtarış tədbirləri nəticəsində saxlanılıb.
Daxili İşlər Nazirliyinin mətbuat xidmətinin Gəncə regional qrupundan AZƏRTAC-a bildiriblər ki, araşdırmalarla onların rayon sakinləri 28 yaşlı Eltac İsazadə və 23 yaşlı Saləddin Hüseynov olduqları müəyyənləşdirilib.
Həmin şəxslər dindirilərkən törətdikləri oğurluq hadisələrini etiraf ediblər. Aparılan araşdırmalar zamanı məlum olub ki, onlar iyul ayı ərzində kənd ərazisindəki iki mağazadan 1503 manat dəyərində tütün məmulatları və müxtəlif növ məhsullar, iki fərdi evdən ümumilikdə 400 manat məbləğində nağd pul, 200 manat dəyərində qol saatı və müxtəlif məbləğlərdə elektrik avadanlığı oğurlayıblar. Davam etdirilən istintaq tədbirləri nəticəsində saxlanılan şəxslərin kənd sakininə məxsus avtomobilə gizli yolla qanunsuz daxil olaraq oradan 200 manat dəyərində musiqi avadanlığı da oğurladıqları müəyyən edilib. Saxlanılan şəxslərin sonuncu cinayət əməli isə rayon sakininə məxsus 800 manat dəyərində mobil telefonu oğurlamaq olub.
Faktlarla bağlı araşdırmalar davam etdirilir.
Bölmənin digər xəbərləri
