GÖZDƏN ƏLİLLƏRİN İQTİSADİ HÜQUQLARININ DƏSTƏKLƏNMƏSİ İLƏ BAĞLI DƏYİRMİ MASA KEÇİRİLMİŞDİR
Mayın 2-də Beynəlxalq Mətbuat Mərkəzində layihə çərçivəsində dəyirmi masa təşkil olunmuşdur. Əmək və Əhalinin Sosial Müdafiəsi, Təhsil, Səhiyyə, İqtisadi İnkişaf nazirliklərinin, Statistika, Ailə, Qadın və Uşaq Problemləri üzrə Dövlət komitələri nümayəndələrinin iştirak etdiyi tədbirdə gözdən əlil insanların problemləri və onların həlli yolları müzakirə olunmuş, konkret işlərin görülməsi üçün təkliflər irəli sürülmüşdür.
Cəmiyyətin vitse-prezidenti Bəybala İbadullayev gözdən əlil insanların iqtisadi hüquqlarının təmin edilməsi məqsədi ilə səhiyyə proqramlarının hazırlanması, onların məktəbəqədər, orta ixtisas, ali və texniki peşə təhsilinə cəlb olunmaları üçün resurs mərkəzlərinin yaradılması, işlə təmin edilməsi, əmək qabiliyyətini tam itirmiş gözdən əlillərin pensiya və müavinətlərinin artırılması, informasiya ilə təmin olunması üçün xüsusi nəşrlərin, dərslik və digər metodik vəsaitlərin hazırlanması məsələləri ilə bağlı dövlət qurumlarına müraciət etmişdir.
Bütün kateqoriyalardan olan əlillərin, o cümlədən gözdən əlillərin problemlərinin dövlətin daim diqqət mərkəzində olduğundan danışan nazirlik və komitə əməkdaşları qaldırılan məsələlər barəsində lazımi tədbirlərin görüləcəyini bildirmişlər.
