“GÜLÜSTAN” SARAYINDA RƏSMİ QƏBUL
AZƏRBAYCAN RESPUBLİKASININ PREZİDENTİ İLHAM ƏLİYEVİN NİTQİ
Əziz qonaqlar!
Mən sizin hamınızı ürəkdən salamlayıram və dəvətimizi qəbul edib bu axşam qəbulda iştirak etdiyinizə görə sizə təşəkkürümü bildirirəm.
Bu gün mənim həyatımda çox əlamətdar bir gündür. Azərbaycan xalqının dəstəyi ilə mənə göstərilən böyük etimadın nəticəsində bu gün mən Prezident vəzifəsinin icrasına başlayıram.
Mən bu gün də, bundan əvvəlki çıxışlarımda da gələcək planlarım haqqında ətraflı danışmışam. Hesab edirəm ki, bunları təkrarlamağa ehtiyac yoxdur. Ancaq bir məqamı yenə vurğulamaq istəyirəm ki, Azərbaycanın xoşbəxt gələcəyi, hərtərəfli inkişafı üçün ölkədə Heydər Əliyevin siyasəti davam etdirilməlidir.
Düşünürəm ki, bu gün ən çox sevinən və bu günü gözləyən cənab Prezident Heydər Əliyevdir. Onun əsəri olan müasir Azərbaycan özünün müəyyən etdiyi yolla gedəcəkdir. Onun siyasəti yaşayacaqdır və Azərbaycan xalqına yeni qələbələr gətirəcəkdir. Ona görə də mən istəyirəm ilk badəni cənab Prezident Heydər Əliyevin sağlığına qaldıraq, ona uzun ömür, cansağlığı arzulayaq. Bütün dövrlərdə və mərhələlərdə o, əsl mənada xalqın lideri olmuşdur və olaraq qalır. Sovet İttifaqı dövründə fərqli sistem olmasına baxmayaraq, Heydər Əliyev çalışırdı ki, Azərbaycanda yeni zavod və fabriklər yaradılsın, iş yerləri açılsın, mədəniyyət, elm, təhsil, ədəbiyyat inkişaf etsin. O, bütün bu məsələlərə böyük diqqət göstərirdi. Məhz o illərdə Azərbaycanda neft infrastrukturu yaradılmışdır. Biz bu gün neft strategiyası haqqında danışırıq, ancaq bilməliyik ki, əgər onun belə uğurla həyata keçirilməsi üçün 1970-ci illərdə möhkəm zəmin yaradılmasaydı, indi gördüyünüz işləri yerinə yetirə bilməzdik. Yəni o dövrdə də Heydər Əliyev öz xalqına xidmət edirdi.
Azərbaycan müstəqillik əldə etdikdən sonra formalaşmış yeni ictimai-siyasi mühitdə də Heydər Əliyev əsl liderlik xüsusiyyətlərini nümayiş etdirdi, xalqı böhrandan, anarxiyadan, hərc-mərclikdən inkişafa doğru apardı. Biz hamımız Azərbaycanın hansı təhlükələrlə üzləşdiyini yaxşı xatırlayırıq. Ona görə biz heç vaxt imkan verməməliyik ki, ölkədə yenidən sabitlik pozulsun, xaos və anarxiya yaransın. Azərbaycan xalqı buna heç vaxt imkan verməyəcək, biz də buna yol verməyəcəyik.
Təklif edirəm bu badələri cənab Prezidentin sağlığına qaldıraq. Biz hamımız, bütün Azərbaycan xalqı ona cansağlığı, uzun ömür arzulayır və onun Vətənə dönməsini səbirsizliklə gözləyir.
Cənab Prezidentin sağlığına!
Bölmənin digər xəbərləri
