GÜRCÜSTAN PREZİDENTİ AZƏRBAYCAN NÜMAYƏNDƏ HEYƏTİNİ QƏBUL ETMİŞDİR
Gürcüstan, Azərbaycan, Rusiya və Ermənistan təhlükəsizlik şuraları katiblərinin görüşündə iştirak etmək üçün Azərbaycan Prezidenti İcra Aparatının rəhbəri, Təhlükəsizlik Şurasının katibi Ramiz Mehdiyevin başçılığı ilə Soçiyə gedən nümayəndə heyəti martın 27-də yolüstü Tbilisidə dayanmışdır.
Azərbaycan Prezidenti İcra Aparatının ictimai-siyasi şöbəsinin müdiri Əli Həsənovun və hüquq-mühafizə orqanları ilə iş şöbəsinin müdiri Fuad Ələsgərovun da daxil olduqları nümayəndə heyətini Tbilisinin mərkəzi dəmir yol vağzalında Gürcüstan Prezidenti İcra Aparatının rəhbəri Petre Mamradze, Təhlükəsizlik Şurasının katibi Tedo Caparidze, ölkəmizin Tbilisidəki səfiri Hacan Hacıyev və digər rəsmi şəxslər səmimiyyətlə qarşıladılar.
Gürcüstan Prezidenti Eduard Şevardnadze həmin gün Prezident sarayında Azərbaycan nümayəndə heyətini qəbul etdi. Cənab Şevardnadze respublikamızın nümayəndələrini mehribanlıqla salamlayaraq, yolüstü Tbilisidə dayandıqlarına görə onlara minnətdarlığını bildirdi, ölkədə vəziyyət, son hadisələr, Gürcüstan-Rusiya, Gürcüstan-Amerika münasibətləri, bu yaxınlarda Belçikaya səfəri barədə ətraflı söhbət açdı. Belçika tərəfini tarixi “İpək yolu” layihəsi ilə tanış etdiyini və bu ölkənin həmin layihəyə böyük maraq göstərdiyini bildirən Gürcüstan dövlətinin başçısı “İpək yolu”nun bərpası məsələsinin qaldırılmasında və bunun üçün xüsusi layihə hazırlanmasında, dünyanın bir çox dövlətlərinin bu layihədə iştiraka cəlb olunmasında Azərbaycan Prezidenti Heydər Əliyevin xidmətlərini böyük məmnunluqla vurğuladı.
Prezident Eduard Şevardnadze ölkələrimiz arasında münasibətlərdən söhbət açaraq dedi: “Gürcüstanın dövlət müstəqilliyinin möhkəmlənməsində, iqtisadiyyatımızın dirçəlməsində, eləcə də ölkəmizin, çətin də olsa, hər gün bir addım irəliləməsində qardaş Azərbaycanın, onun lideri, dostum Heydər Əliyevin misilsiz əməyi və xidmətləri var”.
Cənab Şevardnadze Xəzərin enerji ehtiyatlarının dünya bazarlarına məhz Gürcüstan vasitəsilə nəqli üçün Azərbaycan Prezidentinin göstərdiyi qətiyyəti minnətdarlıqla xatırladı və əmin olduğunu bildirdi ki, indi Cənubi Qafqaz boru kəməri sistemi adlandırılan Bakı-Tbilisi-Ərzurum qaz kəməri layihəsi də həyata keçiriləcək və nəzərdə tutulan vaxtdadək - 2005-ci ilədək istifadəyə veriləcəkdir.
Azərbaycan Prezidenti İcra Aparatının rəhbəri Ramiz Mehdiyev vaxt tapıb onlarla görüşdüyünə görə Gürcüstan liderinə təşəkkür etdi və Prezident Heydər Əliyevin salamını, ən xoş arzularını ona yetirdi. O, Azərbaycan və Gürcüstan prezidentlərinin əsl qardaş dostluğunun, eləcə də xalqlarımız arasında dostluğun ölkəmizdə yüksək qiymətləndirildiyini söylədi. Ramiz Mehdiyev bildirdi ki, Gürcüstanın hər bir uğuru Azərbaycanın, respublikamızın hər bir uğuru isə Gürcüstanın uğurudur və dövlətlərimizin başçıları bu uğurların daim artması üçün məqsədyönlü fəaliyyət göstərirlər. Azərbaycan nümayəndə heyətinin başçısı Dağlıq Qarabağ və gürcü-abxaz münaqişələrinə toxunaraq dedi: “Biz qəti əminik ki, bu münaqişələr məhz Sizin və Prezident Heydər Əliyevin sülhsevər siyasəti və əzmkarlığı sayəsində ancaq dincliklə, danışıqlar yolu ilə aradan qaldırılacaqdır”.
Gürcüstan Prezidenti İcra Aparatının rəhbəri Petre Mamradze, Azərbaycanın Tbilisidəki səfiri Hacan Hacıyev, digər rəsmi şəxslər görüşdə iştirak edirdilər.
X X X
Görüşdən sonra Gürcüstan Prezidenti AzərTac-ın müxbirinə qısa müsahibəsində Azərbaycan nümayəndə heyətinin Soçiyə gedərkən yolüstü Tbilisidə dayanmasını ölkələrimiz arasında xoş münasibətlərə dəlalət etdiyini bildirərək dedi: “Mən dünyanın görkəmli siyasi xadimi Heydər Əliyev ilə qarşılıqlı surətdə sədaqətli dostluğumuzla fəxr edirəm və onunla tez-tez əlaqə saxlayıram. Biz ölkələrimizdəki vəziyyət barədə bir-birimizə məlumat verir, mühüm məsələlər haqqında məsləhətləşirik”. Cənab Şevardnadze dörd ölkənin təhlükəsizlik şuraları katiblərinin Soçidə qarşıdakı görüşündən danışarkən, indiyədək keçirilmiş görüşlərinin əməli nəticə vermədiyindən təəssüflənsə də, növbəti görüşün nəhayət bir faydası olacağına inandığını bildirdi.
X X X
Azərbaycan nümayəndə heyəti məşhur heykəltəraş Georgi Caparidzenin emalatxanasına gedərək, onun yeni əsərləri ilə tanış oldu.
Sonra nümayəndə heyətinin üzvləri Tbilisinin Ağmaşenebeli prospektində Azərbaycan səfirliyinə ayrılmış yeni binaya gələrək, diplomatik nümayəndəliyimizin iqamətgahı ilə tanış oldular. Bildirildi ki, səfirliyimiz yaxın günlərdə həmin binaya köçəcəkdir.
X X x
Günün sonunda Azərbaycan nümayəndə heyəti Soçiyə yola düşdü. Qonaqları hava limanında Gürcüstan Prezidenti İcra Aparatının rəhbəri Petre Mamradze, ölkəmizin Tbilisidəki səfiri Hacan Hacıyev, digər rəsmi şəxslər yola saldılar.
Şahismayıl Məmmədov
AZƏRTAC-ın xüsusi müxbiri
Tbilisi
Bölmənin digər xəbərləri
