GÜRCÜSTAN PREZİDENTİ MİXAİL SAAKAŞVİLİNİN ÇIXIŞI
Hörmətli qonaqlar və dostlar!
Amerikadan və Britaniyadan olan əziz qonaqlarımız!
Bugünkü mərasimdə iştirak etmək mənim üçün böyük şərəfdir. Ona görə ki, bu, doğrudan da bizim arzularımızın və niyyətlərimizin həyata keçməsi deməkdir. Bir neçə illər bundan əvvəl razılıqların əldə olunmasına və müqavilələrin imzalanmasına baxmayaraq, elə qüvvələr var idi ki, bu layihənin həyata keçirilməsini ləngitmək və onun qarşısında maneələr törətmək istəyirdi. Onlar ümumilikdə regionun inkişafını dayandırmaq istəyirdilər. Hesab edirəm ki, artıq həmin adamların niyyətlərinin boşa çıxdığını demək olar. Bütün bu əngəllərə baxmayaraq, biz layihəni həyata keçirə bildik və əminik ki, neft kəməri vaxtında istismar ediləcəkdir. Bugünkü tədbir buna daha bir əyani misal və neft kəmərinin vaxtında tamamlanacağına bir sübutdur.
Qeyd etməliyəm ki, ölkələrimiz arasında olan əlaqələr çox genişdir. Bu neft kəməri də bizi birləşdirən amillərdən biridir. Eyni zamanda, Gürcüstanla Azərbaycan milyonlarla insanların qəlbində bir-birinə yaxınlaşmışdır. Bizi, həmçinin ölkələrimizin tarixi yaddaşı bir-birinə birləşdirir. Mən iftixar hissi ilə xatırlayıram ki, müstəqilliyimizin ilk illərində biz, həqiqətən, çiyin-çiyinə bir-birimizə yardım göstərdik, qarşımıza çıxan çətinlikləri birlikdə aradan qaldırdıq. Burada etiraf edə bilərəm ki, Azərbaycan bəzən öz ehtiyatlarından kəsərək bizə qardaş əli uzadırdı.
Bu layihənin həyata keçirilməsində cənab Heydər Əliyevin xüsusi rolunu qeyd etmək istəyirəm. Heydər Əliyev Bakıya qayıdanda Azərbaycanda dövlətçilik tamamilə pozulmuşdu. Bu dahi şəxsiyyət heç nədən böyük bir dövlət yaratdı. Heydər Əliyevin hakimiyyətə qayıtması Azərbaycanın bir ictimai-siyasi formasiyadan digərinə keçdiyi dövrə təsadüf edirdi. Xalqın özündə də sabaha inam itmişdi. Heydər Əliyev həmin inamı qaytardı və böyük bir milləti yenidən bir dövlətin içərisində birləşdirdi. Əminəm ki, əsrlər keçəcək və Azərbaycan xalqı bugünkü Prezidentin atasının ölkə üçün, xalq üçün gördüyü işləri unutmayacaqdır.
Bizim borcumuz ondan ibarətdir ki, Gürcüstanda da eyni işləri görək, gürcü xalqını birləşdirək. Gürcü xalqı deyəndə, mən Gürcüstanda yaşayan bütün millətləri nəzərdə tuturam. Bildiyiniz kimi, son illərdə Gürcüstan ağır və kəşməkəşli bir yol keçibdir. Biz məktəblərdə Gürcüstanın müstəqilliyi uğrunda canını qurban vermiş insanların şəklini asırıq. Eyni zamanda, bilirik ki, Azərbaycan üçün də müstəqilliyi qoruyub saxlamaq çox çətin idi. Ona görə də biz müstəqilliyimiz uğrunda həyatlarını qurban vermiş qəhrəmanları unutmamalıyıq. Azərbaycanlılar da Gürcüstanda bizim müstəqilliyimiz uğrunda mübarizə aparmışlar və onlar bizim vətəndaşlarımız, öz doğmalarımızdır. Biz istəyirik ki, onlar gürcülərlə qaynayıb-qarışsınlar və Gürcüstanın ayrılmaz hissəsi olsunlar. Onlara münasibətdə Gürcüstanda ədalət prinsipi olmalıdır. Onlar həmişə hiss etməlidirlər ki, Gürcüstanda heç bir azərbaycanlını incitməyəcəklər. Əlbəttə, məndə elə bir illüziya yoxdur ki, bu neft kəməri bütün problemləri həll edəcəkdir. Məndən öncəki iqtidar həmişə deyirdi ki, bu neft kəməri problemlərin hamısını həll edəcəkdir. Amma eyni zamanda, mən onu da etiraf etməliyəm ki, Bakı-Tbilisi-Ceyhan neft kəməri ən böyük amillərdən biridir.
Biz eyni zamanda, Gürcüstanda dövlətin borcu kimi yığılmış maaşları, təqaüdləri verə bildik, struktur islahatları apardıq, polis öz funksiyalarını icra etməyə başladı. İki-üç gün öncə biz Gürcüstanda elan etdik ki, bütün biznesmenlərin bu günədək olan borcunu bağışlayırıq, amma bundan sonra onlar öz vəsaitlərinin həcmini açıqca göstərməli və Gürcüstanın iqtisadiyyatına yönəltməlidirlər. Mən onların toxunulmazlığını bəyan etdim və onlara təminat verdim. İstəyirəm ki, artıq Gürcüstanda insanlarda dövlətə inam olsun və onlar bilsinlər ki, iqtisadiyyata qoyduqları pullar ölkənin gələcəyinin və inkişafının təminatıdır.
Ötən həftə ərzində BTC şirkəti ilə bizim aramızda danışıqlar nəticəsində razılıq əldə olundu. Danışıqlar ekoloji cəhətdən Gürcüstan üçün ən mühüm regionlara aid idi. Bildiyiniz kimi, Bakı-Tbilisi-Ceyhan neft kəməri Gürcüstanın gələcəyi üçün böyük əhəmiyyətə malik olan ekoloji bölgələrdən keçir və danışıqlardan sonra əldə olunmuş razılıq və ayrılacaq məbləğ ölkəmizin kurort zonasında xeyli işlər görülməsinə imkan verəcəkdir. Biz bütün bu layihələrin həyata keçirilməsi üzrə addım-addım irəliləyərək, ayaq üstə dura biləcəyik. Bizim xalqımız hələ kasıbdır, sosial problemlərimiz çoxdur. Amma illər ərzində yığılmış problemləri bir gündə həll etmək mümkün deyildir. Biz çalışırıq ki, səylərimizi artıraq. Səkkiz ay ərzində əldə etdiklərimiz yəqin ki, başqa şəraitdə dörd-beş ilə görülərdi. İnanıram ki, biz insanlarımızın gələcəyi naminə gördüyümüz işləri uğurla başa çatdıracağıq. Bizim üçün ən önəmlisi vətəndaşların həmrəyliyidir. Gürcü və Azərbaycan xalqları artıq bizim seçimimizin doğru olduğuna inanıblar. Biz bütün ölkələrlə - Rusiya, Türkiyə ilə əlaqələrimizin yaxşı olmasını istəyirik. Biz ölkələrimizin inkişafında Türkiyənin rolunu danılmaz hesab edirik. Bu layihənin və digər proqramların həyata keçirilməsində ABŞ-ın və Böyük Britaniyanın xüsusi rolunu da qeyd etməliyik.
Bir daha sizi salamlayıram. Bizim üçün çox əhəmiyyətlidir ki, bir daha görüşdük. Mən İlham Əliyevlə görüşə heç zaman rəsmi görüş kimi gəlmirəm. Çünki rəsmi görüş bir növ gərginliklə müşayiət olunur və bəzən bu görüşlərdə adamın üzü də gülmür. Mən İlham Əliyevi bir qardaşım kimi görəndə, onun üzünə gülümsəmək istəyirəm. Ömrümün 36-cı ilində deyə bilərəm ki, məni Azərbaycan Prezidenti ilə bir çox amillər birləşdirir. İlk növbədə, bizi xalqlarımızın gələcəyi və tutduğumuz mövqelər, habelə öz dövlətimizə və millətimizə olan məhəbbətimiz birləşdirir. Bir daha sizi təbrik edir və uğurlar arzulayıram.
Bölmənin digər xəbərləri
