DÜNYA
Gürcüstan prokurorluğu saxta “çağrı mərkəzləri”nə qarşı genişmiqyaslı tədbirlər həyata keçirib
![Gürcüstan prokurorluğu saxta “çağrı mərkəzləri”nə qarşı genişmiqyaslı tədbirlər həyata keçirib](/files/2023/3/1200x630/16994605375358264942_1200x630.jpg)
Tbilisi, 8 noyabr, AZƏRTAC
Gürcüstan Prokurorluğu 11 ölkənin səlahiyyətli qurumlarının nümayəndələrinin iştirakı ilə 23 ölkədə, o cümlədən Gürcüstanda saxta “çağrı mərkəzləri”nə qarşı genişmiqyaslı tədbirlər həyata keçirib.
AZƏRTAC xəbər verir ki, bununla bağlı Gürcüstanın Baş Prokurorluğu məlumat yayıb.
Bildirilir ki, Gürcüstanın Baş Prokurorluğu beynəlxalq miqyasda fəaliyyət göstərən fırıldaqçı “çağrı mərkəzləri”nin aşkarlanması məqsədilə Eurojust və tərəfdaş ölkələrin səlahiyyətli qurumları ilə fəal əməkdaşlığı davam etdirib.
Birgə istintaq çərçivəsində müəyyənləşdirilib ki, mütəşəkkil dəstə üzvləri etibarlı investisiya şirkətləri təəssüratı yaratmaq üçün yüzlərlə internet səhifələrindən istifadə edib və zərərçəkmişlərə müxtəlif növ gəlirli maliyyə sövdələşmələri təklif ediblər. Mütəşəkkil qrupun hədəfi Avropa İttifaqına üzv ölkələrin, o cümlədən İsveçrə və Almaniya vətəndaşları olub. Hazırkı mərhələdə mövcud olan məlumata görə, zərər bir neçə milyon avro təşkil edir.
Gürcüstandakı tədbir çərçivəsində bir neçə “call-mərkəz”də, onlarla fiziki şəxsin mənzillərində, avtomobillərində və iş yerlərində axtarış aparılıb. Elektron məlumat daşıyan qurğular ələ keçirilib. Daşınmaz əmlaklar, bank hesabları və onlara qoyulmuş pullar müsadirə edilib.
Xətayi Əzizov
AZƏRTAC-ın xüsusi müxbiri
Tbilisi