GÜRCÜSTANDA VETERANLARIN SAYI ŞİŞİRDİLMİŞDİR
AZƏRTAC-ın xüsusi müxbiri xəbər verir ki, Gürcüstan Veteranlarla İş Departamentinin sədri Nukri Saqareişvili mətbuat konfransında bildirmişdir ki, ötən illər ərzində 400-500 dollara saxta veteran vəsiqəsi almış adamlar bu gün də həmin sənədlər əsasında güzəştlərdən istifadə edir, dövlət büdcəsinə külli miqdarda ziyan vururlar. Buna görə də veteranlar yenidən qeydə alınmış və aydın olmuşdur ki, hazırda veteran vəsiqəsindən 63 mindən çox adam istifadə edir, əslində isə onların sayı 40 mindən artıq deyildir.
N.Saqareişvili demişdir: “Veteran vəsiqəsini saxtakarlıqla əldə edənlər bu il oktyabrın 11-dək sənədlərini Departamentə qaytarmasalar, onların barəsində qanun çərçivəsində tədbir görüləcək, soyadları radio-televiziya ilə səsləndiriləcək və mətbuat səhifələrində dərc olunacaqdır”.
