HACIBABA BAĞIROVUN CIXIŞI:
Yaşa Prezidentim, yaşa!
Yaşa millətinlə baş-başa!
Sonra mədəniyyət və incəsənət xadimlərinin “Yeni Azərbaycan Naminə” İctimai Hərəkatı dəstəkləməsi ilə bağlı bəyanat oxundu.
Bəyanatda deyilir:
“Azərbaycan Respublikasının Prezidenti möhtərəm Heydər Əliyev respublikamıza rəhbərlik etdiyi dövrdə milli mədəniyyətimizin qorunmasına, inkişafına və zənginləşməsinə böyük diqqət yetirmiş, mədəniyyət və incəsənət xadimlərinə xüsusi qayğı göstərmişdir. Mədəniyyətimizin son qərinədəki inkişafı və uğurları məhz onun adı və şəxsiyyəti ilə bağlıdır.
Heydər Əliyev müstəqillik əldə etmiş xalqımızın təhlükəsizliyi və maddi təminatı ilə yanaşı, onun milli mədəniyyətinin inkişafına da şərait yaratmışdır. Dövlətimizin başçısını dinləyərkən bir daha əmin olursan ki, müstəqilliyin ali məqsədi milli-mədəni və mənəvi dəyərlərin bərpa olunması, daha da inkişaf etdirilməsi, xalqın özünü dərk etməsi, öz mənliyinin sahibi olmasıdır.
Heydər Əliyevi dövlət başçısı və şəxsiyyət kimi səciyyələndirən əsas cəhətlərdən biri onun mədəniyyətimizə xüsusi qayğı göstərməsi, xalqın əsrlər boyu yaratdığı mənəvi sərvəti qorumaq və zənginləşdirmək sahəsində yorulmaz fəaliyyətidir.
Ölkə başçısı Azərbaycan xalqının milli mədəniyyətinə, onun tarixi keçmişinə həmişə qayğı və diqqətlə yanaşmış, tarixi şəxsiyyətlərimizin millətin yaddaşında əbədiləşməsi üçün əməyini əsirgəməmişdir.
Bu baxımdan milli mədəniyyətimizin tarixində xüsusi rol oynamış söz ustalarının, musiqi, teatr və kino xadimlərinin, digər şəxsiyyətlərin yubiley tədbirlərinin keçirilməsi, abidələrinin ucaldılması, onların adlarının müxtəlif vasitələrlə əbədiləşdirilməsi xüsusi qeyd edilməlidir. Məhz bunun nəticəsidir ki, mədəniyyət və incəsənət xadimlərimiz bu illərdə yaradıcılıq axtarışlarını genişləndirmiş, böyük sənət uğurları qazanmışlar.
Milli mədəniyyətimiz ayrı-ayrı ölkələrdə təbliğ edilir, mədəniyyət və incəsənət xadimlərimiz respublikamızın hüdudlarından kənarda da yaxşı tanınır.
Heydər Əliyevin yaradıcı insanlara qayğısı ğöz qabağındadır. Mədəniyyət xadimlərinin fəxri adlara, “İstiqlal” və “Şöhrət” ordenlərinə, xüsusi təqaüdə və mükafata layiq görülməsi bu diqqət və qayğının təzahürüdür.
Bu da bəllidir ki, ölkə başçısı son on ildə mədəniyyət və incəsənət işçilərinin əmək haqlarını bir neçə dəfə artırmış, bununla da teatrlarımızı, muzeylərimizi, kitabxanalarımızı, ayrı-ayrı yaradıcılıq kollektivlərini qoruyub saxlamağa nail olmuşdur. Nəticədə isə, ümumən, mədəniyyətimiz daha da inkişaf edir.
Heydər Əliyev bu il iyulun 5-də mədəniyyət və incəsənət işçilərinin əmək haqlarının artırılması haqqında imzaladığı Sərəncamla çoxminli mədəniyyət işçilərinə və onların ailə üzvlərinə böyük sevinc bəxt etmiş oldu. Ölkə başçısı bu Sərəncamla milli mədəniyyətimizin inkişafı üçün hələ 1969-cu ildən başlamış olduğu işi davam etdirdi, yaradıcı insanlara diqqət və qayğısını bir daha sübuta yetirdi.
Onun təşəbbüsü ilə, Azərbaycan xalqının yetirdiyi böyük şəxsiyyətlərin – Üzeyir Hacıbəyovun, Səməd Vurğunun, Hüseyn Cavidin, Cəfər Cabbarlının, Bülbülün, Məmməd Səid Ordubadinin, Nəriman Nərimanovun, Cəlil Məmmədquluzadənin və bir sıra başqalarının xatirə muzeyləri yaradılmış, bu muzeylər həmin şəxsiyyətlərin nurlu xatirəsini əbədiləşdirən müqəddəs yerlərə, eyni zamanda, mədəni irsimizin toplandığı və qorunduğu zəngin mədəniyyət ocaqlarına çevrilmişdir. Ölkə başçısı bu muzeylərin təntənəli açılışı mərasimlərində şəxsən iştirak etmiş, sonradan bəzilərini yenidən ziyarətə getmişdir.
1980-ci ildən başlayaraq, respublikamızın ayrı-ayrı şəhər və rayonlarında tarix-diyarşünaslıq muzeylərinin yaradılması xalqımıza məxsus milli sərvətin – tariximiz və mədəniyyətimizlə bağlı dəyərlərin, ulu keçmişimizi özündə yaşadan yadigarların toplanması, qorunması, öyrənilməsi və gənc nəslin tərbiyəsində istifadə edilməsi üçün böyük əhəmiyyətə malik hadisə olmuşdur.
Mədəniyyət və incəsənət xadimləri ölkə başçısının qayğısına öz əməli fəaliyyətləri, yaradıcılıq uğurları ilə cavab verir, onu dəstəkləyir, ona inanır və onunla fəxr edirlər.
Bu gün müstəqil Azərbaycanın dövlət quruculuğu sahəsində zəruri olan addımlar atılmışdır. Ölkəmizdə ictimai-siyasi sabitlik əldə edilmişdir, əmin-amanlıq hökm sürür, əhalinin fiziki və mənəvi toxunulmazlığı təmin edilmişdir. Azərbaycanın haqq səsi Avropa Şurasının mötəbər kürsüsündən eşidilir.
Bütün bunlar möhtərəm Prezidentimiz Heydər Əliyevin xidmətləri sayəsində mümkün olmuşdur.
Biz – mədəniyyət və incəsənət xadimləri möhtərəm Heydər Əliyevin ölkəmizdə yaratdığı sabitliyin heç kəs tərəfindən pozulmasına imkan verməyəcəyik. Məhz bu sabitlik bizə sərbəst yaradıcılıqla məşğul olmağa şərait yaratmışdır.
Biz – mədəniyyət və incəsənət xadimlərinin bugünkü görüşünün iştirakçıları Azərbaycan Respublikasının Prezidenti Heydər Əliyevi ümummilli lider kimi qəbul edir, onun bütün sahələrdə olduğu kimi, mədəniyyət və incəsənət sahəsində də xidmətlərini yüksək qiymətləndiririk.
Azərbaycan mədəniyyətinin gələcək inkişafı məqsədi ilə biz “Yeni Azərbaycan Naminə” İctimai Hərəkata qoşularaq, onu dəstəklədiyimizi bildirir, növbəti prezident seçkilərində möhtərəm Heydər Əliyevin seçki kampaniyasında fəal iştirak edəcəyimizi və onun namizədliyini dəstəkləyəcəyimizi bəyan edirik.
