Hafiz Cəfərov: Azərbaycan müharibə şəraitində olduğundan atıcılıqla məşğul olan yeniyetmələrin sayı artırılmalıdır
Qəbələ, 9 may, Şahnəzər Bəşirov, AZƏRTAC
Son illər Azərbaycanda atıcılıq idmanının inkişafı istiqamətində xeyli işlər görülüb. Dövlət tərəfindən bu sahəyə böyük diqqət və qayğı göstərilir. Qəbələdə və Bakıda müasir atıcılıq kompleksləri inşa edilib. Azərbaycanda atıcılıq sahəsində çoxlu idmançıların yetişməsi üçün hər cür şərait var. Yeniyetmə və gənclər bu şəraitdən yaxşı bəhrələnərək yarışlarda yüksək nəticələr əldə edə bilərlər.
Bu sözləri AZƏRTAC-ın bölgə müxbirinə müsahibəsində Azərbaycan Atıcılıq Federasiyasının birinci vitse-prezidenti, Əməkdar Məşqçi Hafiz Cəfərov deyib.
Sovet dövründə Azərbaycandakı idman cəmiyyətlərinin nəzdində atıcılıq bölmələrinin fəaliyyət göstərdiyini, yeniyetmə və gənclərdə bu sahəyə maraq yaradıldığını, çoxlu idmançıların yetişdirildiyini bildirən H.Cəfərov diqqətə çatdırıb: “Ölkəmiz müstəqilliyini bərpa etdikdən sonra uzun illər bu sahədə idmançıların yetişdirilməsi üçün şərait olmayıb, məktəblər fəaliyyət göstərməyib. Yalnız 2009-cu ildə Bakıda Respublika Stend Atıcılığı İdman Məktəbi faəliyyətə başlayandan sonra bu sahədə canlanma hiss olunub. Hazırda bu məktəbdə 50 idmançı atıcılıqla gündəlik məşğul olur, təlim-məşqlərdə, yerli və beynəlxalq yarışlarda iştirak edir. Beş ildir fəaliyyət göstərən “Qəbələ” atıcılıq klubunda isə 12 gənc atıcılıqla peşəkar səviyyədə məşğul olur. Bu klub yeni olsa da, artıq onun üzvlərindən Elvin İsmayılov, Elçin Bəkirov, Emin Cəfərov, Nurlana Cəfərova Azərbaycan çempionatının qalibi olub, dünya kuboku yarışlarında və Avropa çempionatında iştirak ediblər. Azərbaycanda hərbi xidmət yaşınadək olan yeniyetmələrdən cəmi 30 nəfər bu idman növü ilə müntəzəm məşğul olur. Halbuki, onların sayı dəfələrlə çox olmalıdır”.
H.Cəfərov müharibə şəraitində olan ölkəmizdə atıcılıqla məşğul olan yeniyetmə və gənclərin sayının artırılmasının vacibliyini vurğulayıb. O, Bakı və Qəbələdən başqa digər bölgələrdə də bu idman növünün yeniyetmələr arasında təbliği və inkişafı üçün tədbirlərin görülməsini vacib hesab edib. Bu idman növü ilə fiziki cəhətdən yararlı olan 11 yaşdan yuxarı uşaqlar məşğul olmağa başlayır. Stend və güllə atıcılığı bahalı idman növüdür, silahlar, güllələr bahadır. Ona görə də idman klubları və cəmiyyətləri bu sahəyə çox maraq göstərmirlər. Bölgələrdə heç olmasa tir atıcılığı bölmələri çox olmalıdır ki, yeniyetmələrdə atıcılıq sahəsinə maraq yaransın. Onlar ilk növbədə silahla davranış qaydalarını öyrənsinlər.
Əməkdar Məşrçiq bildirib ki, sovet dövründə Azərbaycanda atıcılıq üzrə tanınmış idmançılar yetişib. Həmin idmançılar 1997-ci ilədək beynəlxalq yarışlardan ölkəmizə medallar gətirməyi davam ediblər. 1997-ci ilədək keçirilən beynəlxalq atıcılıq yarışlarında Azərbaycan idmançıları Rusiya və digər sovet ölkələri arasında ən çox medal qazanan atletlər olublar. Dairəvi stend atıcılığı üzrə sonuncu SSRİ çempionatının qalibi də məhz Azərbaycan komandası olub: “Mənim yetirmələrim həmin yarışda iki qızıl medal qazanmışdı. Mən yeganə azərbaycanlıyam ki, 2 il 6 ay Moskvada stend atıcılığı üzrə SSRİ yığma komandasının baş məşqçisi olmuşam. Mən SSRİ çempionatının qalibi və rekordçusu olmuşam. Mənim tələbəm, stend atıcılığı üzrə Avropa, dünya və Olimpiya çempionu Zemfira Meftahətdinova dünyada idman sahəsi üzrə bütün titulları qazanıb”.
H.Cəfərov deyib ki, hazırda Azərbaycan atıcıları Qəbələ Stend və Ox Atıcılığı Kompleksində ulu öndər Heydər Əliyevin xatirəsinə həsr edilən Beynəlxalq Qran-Pri yarışlarında 9 ölkənin tanınmış idmançıları ilə birgə mükafatlar uğrunda mübarizə aparırlar. Bu yarış bizim idmançıların peşəkarlıq səviyyəsinin artması üçün çox vacibdir. Beynəlxalq İdman Atıcılıq Federasiyasının rəhbərliyi artıq dördüncü dəfədir ki, ulu öndər Heydər Əliyevin xatirəsinə həsr edilən bu Beynəlxalq Qran-Pri yarışlarının keçirilməsinə görə bizə təşəkkür edir. Çünki bu yarış idmançıların gələn ay Maltada, iyulda ABŞ-da atıcılıq üzrə Dünya Kuboku yarışlarına, Avstriyada atıcılıq üzrə Avropa, Koreyada isə dünya çempionatına hazırlıq baxımından çox əhəmiyyətlidir. Azərbaycan idmançılarının da həmin mötəbər yarışlarda iştirakı gözlənilir.
Bölmənin digər xəbərləri
