HƏMAS siyasi bürosunun üzvü: Girovların azad edilməsinin şərtləri hələ hazır deyil
Bakı, 13 noyabr, AZƏRTAC
İsrailə hücum zamanı əsir götürülən girovların azad edilməsi ilə bağlı müqavilənin şərtləri hələ işlənib hazırlanmayıb.
AZƏRTAC TASS-a istinadla xəbər verir ki, bunu Fələstinin HƏMAS radikal hərəkatının siyasi bürosunun üzvü Usamə Həmdan bildirib.
Usamə Həmdanın bəyanatı hərəkatın teleqram kanalında yayılıb. Bəyanatda qeyd edilib ki, girovların və xarici pasportu olanların azad edilməsi üçün danışıqlar aparılır. Lakin müvafiq yekun düstur hazırlanmayıb.
HƏMAS-ın siyasi bürosunun üzvü onu da bildirib ki, Qəzza zolağına humanitar yardımın sərbəst buraxılması İsrailə hücum zamanı fələstinli qruplar tərəfindən əsir götürülən girovların azad edilməsinin şərtlərindən biridir. “Məhbusların azad edilməsi humanitar məsələdir. Lakin bu, hər iki tərəfdən olmalıdır. Yəni humanitar yardım Qəzza zolağına sərbəst şəkildə daxil olmalıdır”, - teleqram kanalında onun bəyanatından çıxarışlar verilib.
Bölmənin digər xəbərləri
