“HƏYATIN BİR ANI” SƏRGİSİ AÇILMIŞDIR

09.05.2006 [12:53]
Çap et
A⁺ A^-

AZƏRTAC xəbər verir ki, mayın 8-də Azərbaycan Mədəniyyət və Turizm Nazirliyinin və Rəssamlar İttifaqının birgə təşkilatçılığı ilə Vəcihə Səmədova adına sərgi salonunda keçəçilik üzrə rəssam Rauf Əbdülhüseynoğlunun ilk fərdi yaradıcılıq sərgisi açılmışdır.

Sərgidə “Humay” mükafatı laureatı, əsərləri xarici ölkələrdəki muzeylərdə və şəxsi kolleksiyalarda saxlanılan rəssamın 30 əsəri nümayiş etdirilir. Onların arasında “Karvan görüşəndə”, “Leyli sorağında”, “İblis simalılar”, “Butaların rəqsi”, “Oğuz yurdu”, “Kür sahilində axşam” əsərləri diqqəti daha çox cəlb edir.

Açılış mərasimində Rəssamlar İttifaqının sədri xalq rəssamı Fərhad Xəlilov, əməkdar rəssam Ənvər Qarayev və başqaları F.Əbdülhüseynoğlunu təbrik etmiş, respublikamızda bu qədim sənəti yaşadan sənətkara yaradıcılıq uğurları arzulamışlar.

Mərasimdə vurğulanmışdır ki, R.Əbdülhüseynoğlu yaradıcılığı türk xalqları arasında geniş yayılmış, lakin bizdə az qala unudulan nadir bədii keçə sənətini dirçəltmək kimi çox nəcib işə həsr olunmuşdur.

Axırda R.Əbdülhüseynoğlu tədbirin təşkilatçılarına və iştirakçılarına minnətdarlığını bildirmişdir.