Xocavənd, 30 iyul, AZƏRTAC

Qarabağın dilbər guşələrindən olan Xocavənddə həyat yenidən canlanıb. Xocavənd şəhəri ilə yanaşı, rayonun kəndlərində də genişmiqyaslı bərpa və quruculuq işləri görülüb və hazırda bu proses davam etdirilir.

AZƏRTAC-ın bölgə müxbiri xəbər verir ki, "Böyük Qayıdış" Proqramına uyğun olaraq doğma yurdlarına qayıdan sakinlərin məskunlaşması təmin edilib, onlar üçün müasir yaşayış şəraiti yaradılıb və Xocavənddə yeni həyat başlayıb.

Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsinin müdiri Təranə Quliyeva bildirib ki, işğaldan azad edilmiş ərazilərdə “Böyük Qayıdış” Proqramı çərçivəsində bərpa və əsaslı təmir işləri sürətlə davam etdirilir.

İyulun 11-də Prezident İlham Əliyev Xocavənd rayonunun Quzeyxırman və Güneyxırman kəndlərində fərdi evlərin, infrastrukturun və sosial obyektlərin bərpası ilə bağlı görülən işlərlə tanış olub, hər iki kəndə qayıdan sakinlərlə görüşüb. Güneyxırman kəndində ümumilikdə 549 fərdi yaşayış evi mövcuddur. Onlardan 379-u yaşayış üçün yararlıdır, 50 ev istismara tam hazırdır, cari il ərzində isə daha 197 evin hazır olması nəzərdə tutulur. İyulun 8-də kəndə ilk köç həyata keçirilib, 18 ailəyə evlərinin açarları təqdim olunub.

Quzeyxırman kəndində isə ümumilikdə 447 fərdi yaşayış evi mövcuddur. Onlardan 274-ü yaşayış üçün yararlıdır, 100 ev istismara hazırdır, cari il ərzində daha 244 evin istismara hazır olacağı nəzərdə tutulur. İyulun 8-də kəndə ilk köç çərçivəsində 21 ailədən ibarət 87 nəfər Quzeyxırmana - doğma yurduna qayıdıb.

“Ümumilikdə, Xocavənd rayonu üzrə 24 yaşayış məntəqəsində və Xocavənd şəhərində bərpa və əsaslı təmir işləri aparılır. Artıq Xocavənd şəhəri, Hadrut və Qırmızı Bazar qəsəbələri, həmçinin Sos, Xanoba, Xocavənd, Quzeyxırman və Güneyxırman kəndlərinə köç prosesi həyata keçirilib. Hazırda həmin yaşayış məntəqələrində ümumilikdə 919 ailə, 3 min 775 nəfər yaşayır. Bu, “Böyük Qayıdış” Proqramı çərçivəsində Xocavənd rayonunda həyata keçirilən bərpa və quruculuq işlərinin mühüm nəticələrindəndir", - deyə Təranə Quliyeva bildirib.

Xocavənd rayonu Quzeyxırman kəndində ilk məskunlaşan ailələrdən biri də Gözəlovlar ailəsidir. Ailə başçısı Ziyafət Gözəlov deyir ki, doğma yurda qayıtmaq yenidən dünyaya gəlməyə bərabərdir.

"1978-ci ildə Xocavənddə dünyaya göz açmışam. Orta məktəbdə oxuyanda ailəmizlə birlikdə məcburi köçkün düşdük. Uşaqlıq illərim Xocavənddə qaldı. Ağdam rayonunun Mərzili kəndində məskunlaşdıq. Bir il orada yaşadıqdan sonra Ağcabədi rayonuna köçdük. Daha sonra Beyləqan rayonunda dövlətimiz tərəfindən məcburi köçkünlər üçün salınan qəsəbədə məskunlaşdıq. Şəraitimiz yaxşılaşsa da, Vətən həsrəti ilə yaşayırdıq. 1997-ci ildə hərbi xidmətə yollandım. Xidmətimi başa vurduqdan sonra bir müddət təsərrüfat işlərində çalışdım. Daha sonra ordu sıralarında xidmətə başladım. Bizim hər birimizin bir amalı vardı, torpaqlarımızı işğaldan azad etmək. Qismət elə gətirdi ki, Vətən müharibəsinin iştirakçısı oldum. Ali Baş Komandan İlham Əliyevin rəhbərliyi ilə güclü ordumuz, sözün əsl mənasında tarix yazdı. Torpaqlarımız işğaldan azad edildi. Füzuli, Cəbrayıl, Qubadlı, Laçın və Xocavənd istiqamətində gedən döyüşlərdə iştirak etdim. Torpaqlarımızı qarış-qarış azad etmək bizlər üçün qürur hissi oldu. Bu torpaqlar uğrunda canını fəda edən şəhidlərimizə rəhmət, qazilərimizə isə şəfa diləyirəm”.

Ziyafət deyir tarixi günlərə şahid olduq. Azad edilən torpaqlarımız dövlətimizin sayəsində yenidən dirçəldi: “Artıq Qarabağa köçmüşük. Mən buradan çıxanda 14 yaşım vardı. İndi övladlarım mənim həmin yaşımda Qarabağa qayıdıb. Bizim ilk qonağımız dövlətimizin rəhbəri İlham Əliyev oldu. Bu, bizim üçün unudulmaz bir andır”.

Ailə Quzeyxırman kəndində gözəl şəraiti olan evlə təmin edilib. Təsərrüfat üçün geniş həyətyanı sahə ayrılıb.

“Mənim üçün unudulmaz anlardan biri də odur ki, öz övladımı hərbi xidmətə buradan yola saldım. Burada yaşamaq, doğma torpağa qovuşmaq elə hisslərdir ki, onu sözlə ifadə etmək olmur. Sanki yenidən dünyaya gəlmişəm. Bir vaxtlar yarımçıq qalan xatirələrimi indi övladlarım burada davam etdirirlər. Xocavənddə illər sonra məzun olanlar arasında mənim də övladlarım olacaq. Bu, bizim üçün böyük qürurdur”, - deyə Ziyafət əlavə edib.

Evin xanımı Elnurə Gözəlova isə 1983-cü ildə Bakıda anadan olub. Ailə qurduqdan sonra həyat yoldaşından Qarabağ haqqında çox şeylər eşidib: "Həyat yoldaşım danışdıqca bu yerlər haqqında təsəvvürüm yaranırdı. Bir vaxtlar arzuladığımız anlar indi gerçək olub. Ailəmizlə birlikdə Qarabağa qayıtmışıq. Bura gələndə təsəvvür etdiyimdən də gözəl mənzərələrin şahidi oldum. Dövlətimizin sayəsində yenidən dirçələn Xocavənddə bizlər üçün bütün şərait yaradılıb. Bu yerlər çox səfalıdır, gözəl təbiəti, təmiz havası var. Elə bilirəm ki, mən də burada dünyaya göz açmışam. Bu torpaqlar bizim üçün çox doğmadır”.

Ailənin övladı Fatimə Gözəlova təhsilini Xocavənddə öz ata-baba yurdunda davam etdirəcəyi üçün çox sevinir: “Bu yerlər haqqında çox xəyallar qururdum. Atam hər zaman Qarabağın səfalı havasından, gözəl təbiətindən danışardı. Bura gələndə Qarabağın təsəvvür etdiyimdən də gözəl olduğunu gördüm. Çox sevinirəm ki, təhsilimi Qarabağda, Xocavənddə davam etdirəcəyəm. Burada məktəbi bitirdikdən sonra Qarabağ Universitetində təhsilimi davam etdirmək, daha sonra isə Xocavəndə qayıdaraq öz peşəm üzrə çalışmaq ən böyük arzumdur”.

Şəhid Zahid Əliyevin ailə üzvləri də Xocavənddə məskunlaşıblar. Şəhidin həyat yoldaşı Cəmilə Məmmədova deyir ki, Xocavənddə dünyaya göz açıb. Burada ailə qurub, övladları burada dünyaya gəlib.

“Xocavənddə çox gözəl günlərimiz keçib. Birinci Qarabağ müharibəsində həyat yoldaşım döyüşlərə qoşuldu. Özünümüdafiə batalyonunda vuruşurdu. Son ana qədər doğma yurdumuzu tərk etmədik. Həyat yoldaşım həmin döyüşlərdə şəhid oldu və itkin düşdü. Daha sonra biz də öz yurdumuzdan məcburi köçkün düşdük. Köçkünlük dövründə dövlətimizin hər zaman qayğısını hiss etdik. Amma Vətən həsrəti ilə yaşayırdıq, inanırdıq ki, bir gün bu yerlərə qayıdacağıq. Ali Baş Komandan İlham Əliyevin rəhbərliyi ilə güclü ordumuz bizlərə qələbə sevincini yaşatdı, torpaqlarımız azad edildi. İndi Qarabağdayıq”, - deyə Cəmilə xanım bildirib.

O deyir ki, indi şəhidlərin ruhu şaddır: “Xocavəndə qayıdandan sonra həyat yoldaşımı yuxuda gördüm. Çox xoşbəxt idi. Allah bütün şəhidlərimizə rəhmət etsin, qazilərimizə şəfa versin. Bir vaxtlar övladlarımla tərk etdiyim Vətənə indi həm övladlarımla, həm də nəvələrimlə qayıtmışam. Çox gözəl şəraiti olan evlə təmin olunmuşuq. Geniş həyətimiz var, artıq bir çox bitkilər əkmişəm. Buranın dağları da gözəldir. Tez-tez kəklikotu və digər müalicəvi bitkilər yığıram. Meyvə ağaclarımız da var. Bu yerlərin torpağı bərəkətli, havası və suyu safdır. Sanki yenidən dünyaya gəlmişəm", - deyə Cəmilə Məmmədova söyləyib.

_{Müxbir - Aydın Yavərzadə}