MƏDƏNİYYƏT
“HEYDƏR ƏLİYEV. MÜSTƏQİLLİYİMİZ ƏBƏDİDİR” ÇOXCİLDLİYİNİN ONUNCU KİTABI
Dövlət Nəşriyyatı “Heydər Əliyev. Müstəqilliyimiz əbədidir” çoxcildliyinin növbəti - onuncu kitabını çapdan buraxmışdır. Kitaba Azərbaycan dövləti başçısının 1997-ci il mayın 27-dən iyulun 23-dək olan dövrdəki nitqləri, çıxışları, bəyanatları, müsahibələri, məktubları və s. daxil edilmişdir.
Azərbaycan Prezidentinin rəngli fotoşəkli ilə açılan kitabda ölkəmizin Milli bayramı - Respublika günü münasibətilə təntənəli yığıncaqda nitq, “Xəzərneftqaz - 97” 4-cü beynəlxalq sərgi-konfransının açılış mərasimində nitq və yekun sözü, Qazaxıstana rəsmi səfər zamanı bu ölkənin parlamentində çıxış, Əl-Fərabi adına Qazax Milli Dövlət Universitetinin fəxri doktoru diplomunun təqdim edilməsi mərasimində nitq, Özbəkistana rəsmi səfərin gedişində dövlətlərarası və hökumətlərarası sənədlər imzalandıqdan sonra birgə mətbuat konfransında bəyanat, Rusiya-Azərbaycan ikitərəfli sənədlərinin imzalanması mərasimindən sonra birgə mətbuat konfransında bəyanat, Rusiya Elmlər Akademiyasının üzvləri ilə görüşdə nitq, milli təhlükəsizlik orqanları əməkdaşlarının peşə bayramı gününün təsis edilməsinə həsr olunmuş təntənəli yığıncaqda nitq, Avropa-Atlantika Əməkdaşlıq Şurasının üzvü olan ölkələrin dövlət və hökumət başçılarının Madriddə keçirilmiş iclasında nitq, Azərbaycanda 1997-ci ilin birinci yarısında sosial-iqtisadi inkişafın yekunları, aqrar islahatın və özəlləşdirmənin gedişi, təbii fəlakətin nəticələrinin aradan qaldırılması məsələlərinə həsr olunmuş müşavirədə giriş sözü və yekun nitqi, ölkənin iqtisadi, sosial, mədəni inkişafı, daxili və xarici siyasəti ilə bağlı digər materiallar diqqəti cəlb edir.
Bütün bunlar Azərbaycanın müstəqilliyinin daha da möhkəmləndirilməsində, dövlətçilik ənənələrinin inkişafında, dünya dövlətləri ilə siyasi-iqtisadi və mədəni əlaqələrin genişləndirilməsində, Azərbaycan diasporunun mövqelərinin gücləndirilməsi və mütəşəkilliyinin artırılmasında, ölkəmizdə iqtisadi islahatların həyata keçirilməsində və digər sahələrdə Prezident Heydər Əliyevin yorulmaz və məqsədyönlü fəaliyyətini parlaq surətdə əks etdirir.
Azərbaycan Prezidenti xalqımızın tarixinə, mədəniyyətinə daim diqqət və qayğı göstərir. Bu, xalq artistləri Cövdət Hacıyevə, Sara Qədimovaya, Fidan Qasımovaya təbrik məktublarında bir daha ifadəsini tapmışdır.
Bu cilddə ilk dəfə olaraq tarixi hadisələr, müxtəlif iqtisadi-siyasi anlayışlar, şəxsiyyətlər və s. haqqında ensiklopedik səpgili qeydlər, habelə şəxs adları və coğrafi adlar göstəriciləri də verilmişdir.
Kitabın buraxılışına məsul Prezidentin İcra Aparatının rəhbəri Ramiz Mehdiyevdir.