HEYDƏR ƏLİYEVİN 85 İLLİK YUBİLEYİ ƏRƏFƏSİNDƏ RESPUBLİKADA RABİTƏ OBYEKTLƏRİ İSTİFADƏYƏ VERİLİR
Rabitə və İnformasiya Texnologiyaları Nazirliyindən AZƏRTAC-a bildirmişlər kİ, Azərbaycan xalqının ümummilli lideri Heydər Əliyevin 85 illik yubileyi ərəfəsində respublikada bir sıra rabitə obyektləri istifadəyə verilmişdir.
Bakı Telefon Rabitəsi İstehsalat Birliyi Səngəçal qəsəbəsində və Sabunçu rayonunda yeni ATS-lər, Biləcəri qəsəbəsində ONU və DMS 100/200 tipli elektron ATS-lər istifadəyə vermişdir.
“Aztelekom” İstehsalat Birliyi Tərtər, İsmayıllı, Tovuz, Masallı telekommunikasiya qovşaqlarında yeni stansiyalar istismara vermişdir. Birlik Goranboy rayonunda məcburi köçkünlərin məskunlaşdığı ərazidə internet mərkəzi yaratmış, 6 saylı cəzaçəkmə müəssisəsində isə kompyuter sinfi təşkil etmişdir.
“Teleradio” İstehsalat Birliyi tərəfindən Astara və Beyləqan efirə radionəzarət məntəqəsi açılmışdır. İTV telekanalının yayım keyfiyyətinin Bakı və Abşeron yarımadasında yaxşılaşdırılması və yayımın əhatə dairəsinin genişləndirilməsi məqsədi ilə 5 kvt-lıq TV ötürücü istismara verilmişdir.
“Azərpoçt” Dövlət Müəssisəsi isə mayın 9-da Abşeron poçtamtının Mehdiabad, Goranboy poçtamtının Baxçakürd şöbələrini istismara verəcəkdir.
Bölmənin digər xəbərləri
