İÇƏRİŞƏHƏRLƏ TANIŞLIQ
AZƏRTAC xəbər verir ki, Litvanın Baş naziri Gediminas Kirkilasın başçılıq etdiyi nümayəndə heyəti aprelin 22-də İçərişəhərlə tanış olmuşdur. İçərişəhər Dövlət Tarix-Memarlıq Qoruğu İdarəsinin rəisi Kamran İmanov Azərbaycan Prezidentinin “İçərişəhər” Dövlət tarix-memarlıq qoruğu haqqında” Fərman imzaladığını, “İşərişəhər” Dövlət Tarix-Memarlıq Qoruğu İdarəsi yaradıldığını qonaqların diqqətinə çatdırdı, ötən əsrlərin yadigarı olan abidələrin qorunması və bərpasına göstərilən dövlət qayğısından danışdı.
Sonra qonaqlar tanınmış xalça ustası, xalq rəssamı Kamil Əliyevin xalça muzeyində olmuş, onun əsərlərinə maraqla tamaşa etmişlər. Gediminas Kirkilas burada türk dünyasının dahi şəxsiyyətləri ümummilli lider Heydər Əliyevin və Mustafa Kamal Atatürkün, Azərbaycan mütəfəkkirləri Nizami Gəncəvinin, Məhəmməd Füzulinin, İmadəddin Nəsiminin, böyük rus şairi Aleksandr Puşkinin və başqa görkəmli şəxsiyyətlərin portretləri toxunmuş xalçalarla maraqla tanış olmuşdur. Qonağa Azərbaycan xalçaları haqqında ətraflı məlumat verilmişdir.
Litvanın Baş naziri Karvansarada da olmuşdur. Onu burada çay süfrəsinə dəvət etmişlər. Qonağa əl ilə toxunmuş xalça, İçərişəhərlə bağlı kitablar təqdim edilmişdir.
Gediminas Kirkilasa Qız qalası haqqında da ətraflı məlumat verilmişdir.
Qonağı Azərbaycan Respublikasının xarici işlər nazirinin müavini Xələf Xələfov müşayiət etmişdir.
 |
 |
Bölmənin digər xəbərləri
