İctimai nəqliyyata etimadın artırılması avtomobilləşmənin azaldılmasına mühüm töhfə verə bilər - Ekspert rəyi
Bakı, 29 iyul, AZƏRTAC
İctimai nəqliyyata etimadın artırılması avtomobilləşmənin azaldılmasına mühüm töhfə verə bilər.
Bu fikri AZƏRTAC-a açıqlamasında nəqliyyat üzrə ekspert Aslan Əsədov səsləndirib.
Ekspert bildirib ki, vətəndaşlarda ictimai nəqliyyatın etibarlı, rahat və vaxt itkisinə səbəb olmayan nəqliyyat növü olduğuna dair inam formalaşmalıdır: “İnsan əmin olmalıdır ki, ictimai nəqliyyat onu ləngitməyəcək, tıxaclarda əlavə vaxt itirməsinə səbəb olmayacaq və mənzil başına vaxtında çatdıracaq. İctimai nəqliyyata etimad artdıqca şəxsi avtomobildən istifadə meyli azalacaq ki, bu da avtomobilləşmənin səviyyəsinə müsbət təsir göstərəcək”.
A.Əsədovun sözlərinə görə, nəqliyyat sisteminin inkişafında əsas məqsədlərdən biri tıxacların azaldılması və hərəkətin səmərəli təşkili üçün effektiv mexanizmlərin yaradılmasıdır: “Bu istiqamətdə ictimai nəqliyyatın üstünlüyünün artırılması, yol infrastrukturunun təkmilləşdirilməsi və nəqliyyat vasitələrinin fəaliyyətinin daha səmərəli təşkili mühüm əhəmiyyət daşıyır. Nəqliyyat sisteminin inkişafının əsas göstəricilərindən biri vətəndaşın evindən çıxaraq mənzil başına mümkün qədər qısa müddətdə və rahat şəkildə çatmasını təmin etməkdir. Bu məqsədə nail olunması ölkədə nəqliyyat sektorunun inkişafına mühüm təkan verəcək”.
Bölmənin digər xəbərləri
