İCTİMAİ TELEVİZİYA DEMOKRATİYANIN GÖSTƏRİCİSİDİR
İctimai teleradionun ölkənin ən şəffaf və demokratik təsisatlarından biri olduğunu önə çəkən natiq, elə buna görə də təkcə Yayım Şurası qarşısında verdiyi hesabatla kifayətlənmədiyini, kütləvi informasiya vasitələri ılə də görüşməyin vacibliyini vurğulamışdır.
O, təşkilati məsələlərin qısa müddətdə yoluna qoyulmasından, hər şeyə sıfırdan başlamağın çətinliklərindən, az vaxt ərzində televiziya verilişlərinin yayımlanmasına nail olunmasından danışmış, İctimai Teleradionun yerləşdiyi binanın alınmasında, mövcud şəraitin yaradılmasında ölkəmizin Prezidenti İlham Əliyevin diqqət və qayğısını xüsusi vurğulamışdır.
Baş direktor demişdir ki, avqustun 29-dan efirə çıxaraq, elə ilk gündən 18 saat veriliş verən, proqramlarını Türkiyə, İran, Gürcüstan, Orta Asiya ölkələrinə, Rusiyanın böyük bir hissəsinə yayımlayan İctimai Televiziya tamaşaçıların çoxdan gözlədiyi yüksək professionallığa malik, formaca müasir, məzmunca milli bir telekanala çevrilə bilmişdir.
Baş direktor İctimai Televiziyanın siyasətdənkənar qurum olmasından, vəzifəsinin, ilk növbədə, əhalinin maarifləndirilməsindən, mədəniyyətimizin, ədəbiyyatımızın, incəsənətimizin, təhsilimizin təbliğindən ibarət olmasından bəhs etmişdir.
İsmayıl Ömərov əldə edilən uğurlarla yanaşı, yol verilən nöqsanlardan və qarşıda duran planlardan da danışmışdır.
Axırda jurnalistlərin suallarına cavab verilmişdir.
