İdman jurnalistləri arasında “Qarabağ Azərbaycandır!” mini-futbol turniri təşkil ediləcək
Bakı, 19 may, AZƏRTAC
İdman jurnalistləri arasında “Qarabağ Azərbaycandır!” şüarı altında mini-futbol turniri təşkil ediləcək.
AZƏRTAC xəbər verir ki, yarış Azərbaycan İdman Jurnalistləri Federasiyası (AİJF), Gənclər və İdman Nazirliyi, Bədən Tərbiyəsi və İdman Akademiyası və AFFA tərəfindən təşkil ediləcək. Turnirdə iştirak üçün müraciət fərdi qaydada olacaq və rəqiblər püşkatma əsasında müəyyənləşəcək. Komandalara rəmzi olaraq, “Cəbrayıl”, “Füzuli”, “Zəngilan”, “Qubadlı”, “Şuşa”, “Ağdam”, “Kəlbəcər” və “Laçın” adları veriləcək. Yarış hər birində 4 komanda olmaqla iki qrupda təşkil ediləcək. Qruplarda ilk iki yeri tutan komandalar pley-off mərhələsinə vəsiqə qazanacaq. Hər qrupun qalibi digər qrupun ikincisi ilə yarımfinalda qarşılaşacaq.
Yarışda qalib gələn komanda mükafatlandırılacaq. Bundan başqa, turnirdə seçilən üç ən yaxşı jurnalist-futbolçu bu ilin avqustunda Batumidə keçiriləcək jurnalistlərin beynəlxalq futbol turnirində ölkəmizi təmsil edəcək komandada yer alacaq.
Yarış açıq havada - Azərbaycan Dövlət Bədən Tərbiyəsi və İdman Akademiyasının stadionunda keçiriləcək. Turnirin tarixi və keçirilmə qaydaları barədə əlavə məlumat veriləcək.
Turnirdə iştirak etmək istəyən idman jurnalistləri iyunun 1-dək AİJF-nin e-mailinə ([email protected]) ad, soyad, əlaqə telefonu və təmsil etdikləri media orqanının adını göndərməklə qeydiyyatdan keçə bilərlər.
Bölmənin digər xəbərləri
