İLHAMI KÜR KİMİ DAŞARDI ONUN...
Noyabrin 20-də respublika Yazıçılar Birliyinin Natəvan adına klubunda Azərbaycan poeziyasının görkəmli nümayəndələrindən biri, Dövlət mükafatı laureatı, əməkdar incəsənət xadimi, şair Əliağa Kürçaylının xatirə gecəsi keçirilmişdir.
Gecəni Yazıçılar Birliyinin katibi Arif Əmrahoğlu açdı, gözəl poeziya kitablarından, orijinal tərcümələrdən, şirin mahnılardan, maraqlı librettolardan ibarət qiymətli ədəbi irs qoyub getmiş Əliağa Kürçaylının yaradıcılığından danışdı.
Xalq şairi Qabil, Azərbaycan MEA-nın akademiki Bəkir Nəbiyev tənqidçi Vaqif Yusifli, xalq yazıçıları Qılman İlkin, Hüseyn Abbaszadə və başqaları ilhamı Kür kimi daşmış Əliağa Kürçaylı lirikasına xas olan nikbin fəlsəfi baxışdan, yüksək vətəndaşlıq, vətənpərvərlik hisslərindən, duyğular dramatizmindən, şairlə bağlı xoş xatirələrindən söhbət açdılar.
Qeyd edildi ki, Kürçaylı ədəbi əlaqələrin inkişafına və möhkəmləndirilməsinə də böyük xidmət göstərmişdir. Azərbaycan oxucusu onun tərcüməsində dünya poeziyasının bir sıra qiymətli əsərləri ilə tanış olmuşdur.
Əliağa Kürçaylının həyat yoldaşı Şəhla Kürçaylı çıxış edərək, şairin xatirəsinə göstərilən diqqətə görə tədbir iştirakçılarına təşəkkürünü bildirdi.
Axırda bədii qiraət ustaları Əliağa Kürçaylının şerlərini oxudular.
Bölmənin digər xəbərləri
