İmantas Melyanas: Xocali faciəsi davam edir
Vilnüs, 26 fevral (AZƏRTAC). Xocalı faciəsi davam edir. Bu fikri AZƏRTAC-ın müxbiri ilə söhbətində Vilnüsdə keçirilən “Xocalı soyqırımı Cənubi Qafqazda həll olunmamış münaqişələrin beynəlxalq kontekstində” mövzusunda konfransda iştirak edən Litva-Azərbaycan Assosiasiyasının prezidenti, tanınmış Litva tarixçisi İmantas Melyanas səsləndirmişdir.
Litva tarixçisi demişdir ki, anım tədbirləri, konfranslar keçirmək lazımdır, çünki zaman keçir, insanlar sanki məlum tarixi fakta alışırlar, lakin dəhşətli hal budur ki, heç nə dəyişmir. İ.Melyanas demişdir ki, Ermənistanın beynəlxalq hüququn norma və prinsiplərinə məhəl qoymaması nəticəsində Azərbaycan ərazilərinin Ermənistan tərəfindən işğalı bugünədək davam edir, Xocalı faciəsinin günahkarları isə cəzasız qalmışlar.
Litva-Azərbaycan Assosiasiyasının prezidenti bildirmişdir ki, bəzi pozucu qüvvələr yalnız bir məqsəd güdən - xalqların nifrətini oyadan, daxili münaqişələr doğuran xüsusi süni təşkilatlar, internet-saytlar yaradırlar.
Azərbaycanın Xocalı şəhərinin dinc əhalisinə qarşı törədilmiş dəhşətli cinayətə hüquqi qiymət verilməsinin zəruri olduğunu vurğulayan İ.Melyanas demişdir ki, tarixdə belə qanlı hadisələrin təkrarlanmaması üçün gənc nəsil öz xalqının tarixini bilməli, onun üzləşdiyi bütün bəlaları xatırlamalıdır.
Nigar Cəfərli
AZƏRTAC-ın xüsusi müxbiri
Vilnüs
Bölmənin digər xəbərləri
