İncəsənət və musiqi məktəblərində distant tədrisin yaxşılaşmasına həsr olunmuş videokonfrans
Bakı, 7 may, AZƏRTAC
Ölkəmizdə tətbiq olunan xüsusi karantin rejimi ilə əlaqədar mədəniyyət idarələrin tabeliyində olan müəssisələr fəaliyyətini onlayn şəkildə davam etdirir.
AZƏRTAC xəbər verir ki, Kürdəmir Regional Mədəniyyət İdarəsinin əhatə etdiyi rayonlarda fəaliyyət göstərən uşaq incəsənət və musiqi məktəblərin rəhbərlərinin iştirakı ilə videokonfrans keçirilib.
İdarə rəisi Elman Məmmədov mövcud şəraitdə məktəblərin fəaliyyətini yeni dövrün tələblərinə uyğun qurmaq, şagirdlərin musiqi təhsilinin səviyyəsini yaxşılaşdırmaq üçün müasir texnoloji imkanlardan istifadə edilməsinin zəruriliyi barədə məlumat verib .
Sosial izolyasiya qaydalarının tətbiq olunduğu karantin müddətində musiqi məktəblərində distant təhsilin keyfiyyətinin artırılması və asudə vaxtın səmərəli təşkili üçün verilən virtual konsertlərdən bəhs olunub, Mədəniyyət Nazirliyinin elan etdiyi müsabiqələrdə fəal iştirak etmək, yeni videoçarxların yüksək səviyyədə hazırlanıb təqdim olunması üçün tapşırıqlar verilib.
Videokonfransda yaşı 65-dən yuxarı olan mədəniyyət işçilərinə qayğı göstərilməsinin vacibliyi də vurğulanıb.
Bölmənin digər xəbərləri
