İNFORMASİYA-KOMMUNİKASİYA TEXNOLOGİYALARI ÜZRƏ NÖVBƏTİ TRENİNQ KEÇİRİLMİŞDİR
“Multimedia” İnformasiya Sistemləri və Texnologiyaları Mərkəzindən AZƏRTAC-a bildirmişlər ki, “Jurnalistlərin informasiya-kommunikasiya texnologiyaları üzrə bacarıqlarının artırılmasına dəstək” layihəsi çərçivəsində növbəti treninq keçirilmişdir.
Layihənin məqsədi jurnalistlərin peşəkarlığının artırılmasına kömək göstərmək, informasiya cəmiyyətinin tələblərinə cavab verən jurnalistlər hazırlamaq, media subyektlərinin fəaliyyətini müasir tələblər baxımından təkmilləşdirmək üçün metodiki-informasiya dəstəyi göstərməkdir.
Tədbirdə müxtəlif KİV-lərdə çalışan jurnalistlər və tələbələr iştirak etmişlər.
Treninqdə bloq sistemləri, sosial resurslar və onlardan istifadə qaydaları, anonimlik və s. barədə məlumat verilmiş, mövzu ətrafında təcrübi nümunələr təqdim olunmuşdur.
Layihə İREX təşkilatı tərəfindən dəstəklənir.
