İnformatika üzrə beynəlxalq olimpiada ilk dəfə Rusiyada keçiriləcəkdir
Bakı, 2 oktyabr (AZƏRTAC). Rusiya Federasiyası Rabitə və Kütləvi Kommunikasiyalar Nazirliyinin saytında xəbər verilir ki, informatika üzrə beynəlxalq olimpiada (International Olympiad in Informatics, IOI) 2016-cı ildə Rusiyada keçiriləcəkdir.
Yarışların keçiriləcəyi yer Kazan şəhəri yaxınlığında tikilməkdə olan “İnnopolis” şəhərciyidir. Olimpiada Rusiyada ilk dəfə keçiriləcəkdir. 1990-cı ildə yarışlar Belarusun paytaxtı Minsk şəhərində keçirilmişdir. 2014-cü ildə isə yarış iştirakçılarını Qazaxıstan qəbul edəcəkdir.
2012-ci il Olimpiadası İtaliyanın Sirmione şəhərində keçirilmişdir. Ümumkomanda hesabında Rusiya yığması birinci yeri Çin komandası ilə bölüşmüşdür. Şəxsi hesabda birinci yeri amerikalı Conni Xo, ikinci yeri isə dəfələrlə o və digər müsabiqələrin mükafatçısı olmuş belorus Gennadi Korotkeviç tutmuşdur.
İnformatika üzrə beynəlxalq olimpiada 1989-cu ildən keçirilir. Qaydalara görə, hər ölkə yarışa milli olimpiadaların nəticələri üzrə seçilən dörd nəfər iştirakçı göndərə bilər. 2012-ci il Olimpiadasının tapşırıqları ilə yarışların saytında tanış olmaq olar.
Bölmənin digər xəbərləri
