İNGİLTƏRƏDƏ ŞAHZADƏ ÇARLZIN KONSEPSİYASI ƏSASINDA ŞƏHƏR SALINIR
AZƏRTAC xəbər verir ki, Böyük Britaniyada vəliəhd Çarlz Uelskinin konsepsiyası əsasında şəhər salınacaqdır. Dorset qraflığında olacaq Şerford şəhəri 2020-ci ilədək tikiləcəkdir.
Şerford gələcəyin şəhəri, eyni zamanda, şahzadə Çarlzın insanın təbiətlə vəhdəti arzularının təcəssümü olacaqdır. Şəhərin böyük hissəsi avtonəqliyyat üçün bağlı olacaq velosipedə üstünlük veriləcəkdir. Küçə və meydanlar elə qurulacaq ki, evlərə mümkün qədər çox günəş işığı düşsün.
Şəhərsalmada enerjiyə qənaət edən ən yeni texnologiyalardan istifadə olunacaqdır. Məsələn, şəhəri elektrik enerjisi ilə külək turbinləri təchiz edəcəkdir. Hesablamalar göstərir ki, Şerford Böyük Britaniyanın ekoloji cəhətdən ən təmiz şəhəri olacaqdır.
Şerfordda qabaqcıl şəhərsalma ideyaları ənənəvi ingilis üsulunda həyata keçiriləcək. Əsas küçə qədim Malboro şəhərinin mərkəzi küçəsinə bənzəyəcək. Buradakı üçmərtəbəli mülklər qədim üslubda tikiləcəkdir. Şerfordda beş mərtəbədən hündür bina tikmək qadağandır.
Şəhər 12 min sakin üçün nəzərdə tutulmuşdur.
Bölmənin digər xəbərləri
