“İNTERFAX” İNFORMASİYA AGENTLİYİNİN GƏNCƏ ÜZRƏ MÜXBİR MƏNTƏQƏSİ FƏALİYYƏTƏ BAŞLAMIŞDIR
AZƏRTAC xəbər verir ki, mayın 2-də “İnterfax” informasiya agentliyinin Azərbaycanda fəaliyyət göstərməsinin 5 illiyi və bu agentliyin Gəncə üzrə müxbir məntəqəsinin açılışı ilə əlaqədar tədbir keçirilmişdir.
Şəhər ictimaiyyəti və kütləvi informasiya vasitələri nümayəndələrinin iştirakı ilə keçirilən tədbirdə şəhər icra hakimiyyəti başçısının müavini Akif Ələkbərov “İnterfax”ın 5 ildə gördüyü işlərdən danışmış və bu agentliyin respublikamızın ikinci sənaye və mədəniyyət mərkəzində müxbir məntəqəsinin açılmasını müsbət dəyərləndirmişdir.
Agentliyin Gəncə məntəqəsinin əməkdaşı Fərid Mehdiyev fəaliyyət proqramı barədə məlumat vermişdir. Tədbir iştirakçıları agentliyin işinə uğurlar arzulamışlar.
