“İrəli” İctimai Birliyi Azərbaycan Gəncləri Günü münasibətilə onlayn tədbir keçirəcək
Bakı, 29 yanvar, AZƏRTAC
“İrəli” İctimai Birliyi 2 fevral - Azərbaycan Gəncləri Günü münasibətilə “Məndən başlanır Vətən!” adlı onlayn tədbir keçirəcək.
İctimai Birlikdən AZƏRTAC-a bildiriblər ki, tədbirdə müxtəlif sahələrdə ölkəmizi uğurla təmsil edən peşəkar və fəal gənclər iştirak edəcəklər.
Onlayn görüşün ilk hissəsində spikerlər vətənpərvər ruhda yetişən Azərbaycan gəncliyi və dövlət gənclər siyasətinin bu prosesdə rolu ilə bağlı düşüncələrini bölüşəcəklər. Bu hissədə, həmçinin “Hərbi vətənpərvərlikdə gənclərin rolu”, “Vətəndaş cəmiyyətində aktivlik”, “Təhsil və karyera planlaması”, İnformasiya müharibəsi” mövzularında çıxışlar ediləcək, gəncləri maraqlandıran məsələlər müzakirə olunacaq.
Tədbirin ikinci hissəsində ölkəmizi müxtəlif sahələrdə uğurla təmsil etmiş gənclər Azərbaycan həqiqətlərinin dünya ictimaiyyətinin diqqətinə çatdırılması, “fake” xəbərlərlə mübarizə, informasiya müharibəsi, habelə müxtəlif sahələrdə ölkənin uğurla təmsil olunması haqqında fikir mübadiləsi aparacaqlar. Ölkəmizin hüdudlarından kənarda yaşayan gənclərimiz isə təhsil və karyera quruculuğu, xaricdə təmsilçilik mövzularında təcrübələrini bölüşəcəklər.
Onlayn tədbirdə iştirak üçün https://bit.ly/3oupp42 keçidindən istifadə edərək yanvarın 31-i saat 18:00-dək müraciət formasını doldurmaq lazımdır.
Qeyd edək ki, “İrəli” İctimai Birliyi 2 fevral - Azərbaycan Gəncləri Günü münasibətilə əvvəllər də tədbir və yürüşlər həyata keçirib.
Bölmənin digər xəbərləri
