İSGƏNDƏRİYYƏ KİTABXANASININ DİREKTORU AZƏRBAYCAN UŞAQ PARLAMENTİNİN ÜZVLƏRİ İLƏ GÖRÜŞMÜŞDÜR
AZƏRTAC xəbər verir ki, iyunun 12-də YUNİSEF-in ölkəmizdəki nümayəndəliyinin təşkilatçılığı ilə Beynəlxalq Mətbuat Mərkəzində İsgəndəriyyə kitabxanasının direktoru doktor İsmayıl Serageldin Azərbaycan uşaq parlamentinin üzvləri ilə görüşmüşdür.
Azərbaycana ikinci dəfə gəldiyini vurğulayan qonaq ölkəmizdə böyük dəyişikliklərin şahidi olduğunu, Bakının daha da gözəlləşdiyini, yeni binaların tikildiyini bildirmişdir. O, ölkəmizdə Uşaq Parlamentinin yaradılmasını Azərbaycanda demokratiyanın inkişaf etdirilməsində müsbət hadisə olduğunu qeyd etmişdir.
Parlament üzvlərinin suallarını cavablandırarkən İ.Serageldin demişdir ki, son vaxtlar dünyanın 70-dən çox ölkəsində olmuşdur. Azərbaycan özünün iqtisadi inkişafı ilə yanaşı, həm də insanların, xüsusən uşaq və gənclərin müasir düşüncə tərzləri ilə həmin ölkələrin əksəriyyətindən fərqlənir. Azərbaycanın uşaq və gəncləri beynəlxalq tədbirlərdə də mənsub olduqları ölkəni ləyaqətlə təmsil edirlər.
Görüşdə Uşaq parlamenti sədrinin birinci müavini Fəridə Əliyeva, Kürdəmir rayonundan gəlmiş parlament üzvü Nərminə Hüseynzadə və başqaları oxuduqları məktəbdə qurumun üzvü kimi gördükləri işlərdən, onların təşəbbüsü ilə həyata keçirilən tədbirlərdən danışmışlar.
Qonaq Uşaq parlamenti üzvlərinin ictimai fəallığından razı qaldığını bildirmişdir.
Tədbirdə Misirin ölkəmizdəki səfiri Yusif Əhməd İbrahim əl-Şarkavi iştirak etmişdir.
Bölmənin digər xəbərləri
