İsveç həbsxanalarında ən çox maraq doğuran kitablar məlum olub
Stokholm, 6 oktyabr, Nərgiz Cəfərli, AZƏRTAC
Hakimiyyət, xuliqanlıq və cinayət haqqında kitablar İsveç həbsxanalarında məhbusların diqqətini xüsusilə cəlb edir.
AZƏRTAC xəbər verir ki, bunu Kumla və Hal həbsxanalarındakı kitabxanaların statistik məlumatları sübut edir. Cinayətkar qruplar arasında çəkişmələr üzrə isveçli ekspert, alban əsilli jurnalist Diamant Salihunun əsərləri ən çox icarəyə götürülən kitablardır.
Onun “Fokstrot” cinayət şəbəkəsindən bəhs edən “Heç kim dinləməyəndə” adlı ikinci kitabı yuxarıda adı çəkilən həbsxana kitabxanalarının illik siyahısında liderlik edir.
Hal həbsxanasının ədəbiyyat siyahısında sonrakı yerləri İsveç yazıçılarının əsərləri tutur. İkinci yerdə Torbyorn Qranstromun 2022-ci ildə adambaşına ən çox qətlin qeydə alındığı Sedertelyedə narkotiklərin, bərabərsizliyin, məktəbin və sosial xidmətlərin rolundan bəhs edən “Sedertelyedə müharibə” kitabıdır.
Haldakı məhbusları maraqlandıran növbəti əsər Yohanna Bekstrem Lernebinin "Oyunların kralı" kitabı olub. Əsərdə 70-ci illərdə İsveçə köçüb qumar imperiyası quran mühacirin taleyini izləmək olar.
Kumla həbsxanasında məhbuslar xarici ədəbiyyata, o cümlədən Qreqori Devid Robertsin “Şantaram”, Nikkolo Makiavellinin “Hökmdar” və Robert Qrinin “Hakimiyyətin 48 qanunu” əsərlərinə üstünlük verirlər.
Bölmənin digər xəbərləri
