İsveç polisi Quranın yandırılmasını nəzərdə tutan aksiyanın keçirilməsinə icazə verməyib
Stokholm, 16 fevral, AZƏRTAC
İsveç polisi Quranın yandırılmasını nəzərdə tutan növbəti aksiyanın keçirilməsinə icazə verməyib.
AZƏRTAC-ın xüsusi müxbiri xəbər verir ki, bu dəfə bazar ertəsi Stokholmdakı İraq səfirliyi qarşısında nəzərdə tutulan aksiyanın keçirilməsi üçün müraciət edən adı qizli saxlanılan təşkilat rədd cavabını alıb. Yerli asayiş keşikçiləri, öz qərarlarını Quranın yandırılmasının İsveçə qarşı terror aktlarına səbəb ola bilməsi riski ilə əsaslandırıb.
"Ümumilikdə, İsveç Təhlükəsizlik Polisinin (SAPO) qənaətinə əsasən, ölkə ərazisində Quran yandırma aksiyalarının artımı, qısa müddət ərzində İsveçə və İsveçin maraqlarına qarşı hücum təhlükəsini çoxalmasına səbəb ola bilər", - deyə İsveç polisinin qərarında deyilir.
Qeyd edək ki, bu Stokholmda cari ay ərzində bu tip aksiyalara icazənin verilmədiyi ikinci aksiyadır. Quranın daha əvvəl radikal sağçı antimüsəlman siyasətçi Rasmus Paludan tərəfindən Stokholmdakı Türkiyə səfirliyinin qarşısında yandırılması beynəlxalq səviyyədə kəskin reaksiyalara səbəb olub və nəticədə, İsveçə qarşı təhdidlərin artmasına gətirib çıxarıb.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
