İtaliya-Azərbaycan Beynəlxalq Film Festivalı çərçivəsində ustad dərsi təşkil edilib

30.01.2019 [12:00]
Çap et
A⁺ A^-

Bakı, 30 yanvar, AZƏRTAC

İtaliya-Azərbaycan Beynəlxalq Film Festivalı çərçivəsində “The Landmark”da ustad dərsi keçirilib.

AZƏRTAC xəbər verir ki, ustad dərsi Venesiyanın Ca Foscari Universiteti və Azərbaycan Dövlət Mədəniyyət və İncəsənət Universitetinin dəstəyi ilə təşkil edilib.

Tədbirdə festivalın prezidenti, tanınmış aktyor Remo Cerone, bədii direktoru, rejissor Klaudio Rossi Massimi, “İmago Group” film istehsalı şirkətinin rəhbəri Lucia Macale və aktyor Viktoriya Zinni iştirakçılara İtaliya kinematoqrafiyası üzrə ustad dərsi keçiblər. Həmçinin Venesiyanın Ca Foscari Universitetinin kinematoqrafiya fəaliyyətinin müxtəlif aspektləri müzakirə olunub.

Sonra Ca Foscari Universitetinin tələbələrinin hazırladığı qısa filmlər nümayiş edilib.

Qeyd edək ki, festival İtaliya və Azərbaycan kino sənayesinin keçmişi, bu günü və gələcəyini təbliğ etmək məqsədi daşıyır.