İTALİYADA SEÇKİLƏRDƏ ROMANO PRODİ QALİB GƏLMİŞDİR
Beləliklə, sol mərkəzçi koalisiya milli parlamentin hər iki palatasında çoxluğa nail olmuşdur ki, bu da ona hökuməti formalaşdırmaq hüququ verir.
Səslərin hesablanması ilə məşğul olan Daxili İşlər Nazirliyi bildirmişdir ki, müxalifət koalisiyası senatda 158 yer, Silvio Berluskoni başda olmaqla sağ mərkəzçi koalisiya 156 yer qazanmışdır. Xaricdə yaşayan italiyalıların səslərinin nəticələri həlledici olmuşdur.
Berluskoninin tərəfdarları müxalifətin qələbəsini tanımadıqlarını bildirmiş və səslərin yenidən hesablanmasını tələb edirlər. Onlar təxminən yarım milyon bülletenin ləğv olunması səbəblərinin qanuniliyini də yoxlamaq tələbi irəli sürmüşlər.
67 yaşlı Romano Prodi Skandiano şəhərində doğulmuşdur. 1961-ci ildə Milan Katolik Universitetinin iqtisadiyyat və kommersiya fakültəsini, sonra London İqtisadiyyat və Siyasi Elmlər Məktəbini bitirmişdir. Harvard Universitetində (ABŞ) mühazirələr oxumuşdur. 1978-79-cu illərdə sənaye, ticarət və peşə naziri olmuşdur. 1983-cü ildə Bolonya Universitetində elmi fəaliyyətlə məşğul olmağa başlamışdır və bu təhsil ocağının professorudur. Prodi İtaliya iqtisadiyyatını özəlləşdirmə proqramının, sənayenin yenidən qurulması haqqında qanunun müəlliflərindən biridir. Bir çox elmi əsərləri var. 1996-cı ilin mayından 1998-ci ilin oktyabrınadək İtaliya Nazirlər Şurasının sədri, 1999-2004-cü illərdə Avropa Komissiyasının sədri olmuşdur.
Bölmənin digər xəbərləri
