İTALİYANIN MİLLİ BAYRAMI - RESPUBLİKA GÜNÜ ŞƏRƏFİNƏ
AZƏRTAC xəbər verir ki, İtaliyanın Azərbaycandakı səfirliyi öz ölkəsinin milli bayramı - Respublika günü münasibətilə iyunun 2-də “Hyatt Regency” otelində rəsmi qəbul təşkil etmişdir.
Azərbaycanın və İtaliyanın dövlət himnləri səslənmişdir.
İtaliyanın Azərbaycandakı səfiri Can Luici Maşa demişdir ki, 62 il bundan əvvəl iyunun 2-də İtaliya respublika elan edilmişdir. Səfir iki ölkə arasında əlaqələrin inkişafının müsbət dinamikasından məmnun olduğunu bildirərək qeyd etmişdir ki, Azərbaycan hökumətinin əlverişli investisiya siyasəti italiyalı sahibkarların diqqətini cəlb edir, müştərək şirkətlərin sayı artır, energetika, təhsil, mədəniyyət sahələrində əlaqələr inkişaf edir. İtaliya Azərbaycanı özünün strateji tərəfdaşı hesab edir.
Milli Məclisin sədr müavini Valeh Ələsgərov Prezident İlham Əliyevin İtaliya xalqına təbrikini və ən xoş arzularını çatdırdı.
O qeyd etdi ki, 1997-ci ildə ümummilli lider Heydər Əliyevin İtaliyaya səfərindən sonra ölkələrimiz arasında münasibətlər yeni inkişaf mərhələsinə qədəm qoymuşdur. Bu gün İtaliya Azərbaycanla ən sıx əməkdaşlıq edən Avropa ölkələrindən biridir. Azərbaycan rəhbərliyi İtaliya ilə bütün sahələrdə əlaqələrin dinamik inkişafına böyük əhəmiyyət verir. Yaxın gələcəkdə Azərbaycan qazı Avropa bazarına, o cümlədən İtaliya bazarına daxil olacaqdır.
######
Bölmənin digər xəbərləri
