KAMBOCANIN YENİ KRALI BALET RƏQQASI OLMUŞDUR

18.10.2004 [22:56]
Çap et
A⁺ A^-

AZƏRTAC xarici informasiya agentliklərinə istinadla xəbər verir ki, Kambocanın keçmiş kralı Norodom Sianuk taxt-tacdan imtina etdikdən bir həftə sonra oğlu Norodom Siamoni yeni kral seçilmişdir. Onun namizədliyini ölkənin 9 nəfərdən ibarət Taxt-tac Şurası dəstəkləmişdir.

Balet rəqqası Siamoninin yeganə siyasi fəaliyyəti ölkəsinin YUNESKO-da elçisi işləməsi olmuşdur. Taxt-tac Şrasının yaydığı bəyanatda deyilir ki, kral titulu Siamoniyə dərhal keçsə də, tacqoyma mərasimi bu ayın sonunda olacaqdır.

51 yaşlı subay və musiqi həvəskarı Siamoni əvvəlcə taxt-taca can atmasa da, sonda bildirmişdir ki, Taxt-tac Şurası onu seçərsə, kral olmağa razılıq verəcəkdir. Ola bilsin ki, siyasətdən uzaq olduğunu və müasir Kambocada kralın, əsasən, təşrifati funksiya daşıdığını nəzərə alaraq, atası da, ölkənin Baş naziri Xun Sen də Siamoninin namizədliyini daha münasib saymışlar.

Norodom Siamoni keçmiş kralın böyük oğludur. Çexoslavakiyada və Şimali Koreyada təhsil almışdır. Vətənə qayıtdıqdan sonra o dövrdə hakimiyyətə gəlmiş qırmızı khmerlər onu ev dustağı etmişdilər. Bu rejimin həyata keçirdiyi soyqırım siyasəti kral ailəsindən də yan ötməmişdi.. Sianukun 14 uşağından 5-i qətlə yetirilmişdi.

Qırmızı khmerlər rejiminin süqutundan sonra Siamoni Fransaya getmiş, 1992-ci ildə isə Kambocanın YUNESKO-da təmsilçisi olmuşdur.