KİNOOPERATOR ƏSGƏR İSMAYILOVUN YUBİLEYİ QEYD OLUNMUŞDUR
Tədbir iştirakçıları əvvəlcə yubilyarın yaradıcılığına həsr olunmuş stenddə nümayiş etdirilən fotosənədlərlə tanış olmuşlar.
Mədəniyyət və Turizm Nazirliyinin kino işləri şöbəsinin müdiri vəzifəsini icra edən Cəmil Fərəcov Ə.İsmayılovun yaradıcılıq fəaliyyətinin bəzi məqamlarından danışmışdır. Bildirmişdir ki, Azərbaycan kinematoqrafiyasının yaradıcılarından olan Ə. İsmayılovun lentə aldığı filmlər kino tariximizin qızıl fonduna daxil olmuşdur.
Kinoşünas Aydın Kazımzadə görkəmli sənətkarın həyat və yaradıcılığından ətraflı söz açmışdır. Vurğulamışdır ki, o, hələ “Almaz” (1936), “Kəndlilər” (1939), “Səbuhi” (1941), “Bəxtiyar” (1942) kinofilmlərinin operatoru kimi məşhur idi. İkinci Dünya müharibəsi dövründə “Mosfilm” Bakıya evakuasiya edilərkən Ə.İsmayılov məşhur Sovet kinematoqrafçıları ilə birlikdə çalışmış, rejissor Qriqori Aleksandrov ilə birgə “Bir ailə” (1943) filmini çəkmişdir.
Tədbirdə Ə.İsmayılov istedadlı, erudisiyalı, yüksək mədəniyyətə malik xeyirxah insan kimi dəyərləndirilmişdir.
Görkəmli sənətkarın nəvəsi Nərminə xanım babasının xatirəsinə göstərilən diqqət və ehtirama görə tədbirin təşkilatçılarına və iştirakçılarına minnətdarlığını bildirmişdir.
Axırda Əsgər İsmayılovun lentə aldığı kinofilmlərdən parçalar göstərilmişdir.
Bölmənin digər xəbərləri
