KİPRDƏ GƏNC AZƏRBAYCAN RƏSSAMLARININ SƏRGİSİ AÇILMIŞDIR

14.04.2006 [17:56]
Çap et
A⁺ A^-

Azərbaycan Dövlət Rəssamlıq Akademiyasının (ADRA) rəhbərliyi və bir qrup tələbəsi mədəni mübadilə proqramı çərçivəsində Şimali Kiprdə səfərdə olmuşdur. Respublika Təhsil Nazirliyinin dəstəyi ilə təşkil olunan bu səfər ADRA ilə Şimali Kiprin Yaxın Doğu Universiteti (YDU) arasında imzalanmış müqaviləyə müvafiq surətdə həyata keçirilmişdir. Şimali Kiprin Nikosiya, Girna və Maqusa kimi mənzərəli guşələrinə səfər üçün akademiyanın ən yaxşı 6 tələbəsi seçilmiş, onlar 18 gün ərzində yağlı boya ilə “Kipr mənzərələri” mövzusunda 40-dan çox tablo çəkmişlər.

Akademiyanın rektoru, xalq rəssamı, akademik Ömər Eldarov demişdir ki, YDU-nun foyesində gənc Azərbaycan rəssamlarının əsərlərindən ibarət sərgi açılmışdır.

Sərginin açılışında Şimali Kiprin Baş nazirinin müavini və xarici işlər naziri Sərdar Denktaş, habelə təhsil, mədəniyyət nazirləri, incəsənət xadimləri və türkiyəli qonaqlar iştirak etmişlər. ADRA nümayəndə heyətinin səfəri həm mətbuatda, həm də yerli televiziya ilə geniş işıqlandırılmışdır.

Səfərin təşəbbüskarı, Rəssamlar İttifaqının katibi, ADRA-nın beynəlxalq əlaqələr üzrə prorektoru Səlhab Məmmədov AZƏRTAC-ın müxbirinə bildirmişdir ki, Akademiya tələbələrinin əməyinin nəticəsi olan sərgi YDU ilə əlaqələrin möhkəmləndirilməsinə xidmət edəcəkdir. Müqaviləyə əsasən, belə səfərlər ildə iki dəfə təşkil olunacaqdır. Oktyabr ayına nəzərdə tutulan növbəti səfər zamanı nümayiş etdiriləcək tablolarda Kipr motivləri ilə yanaşı, Azərbaycan mövzusu da əksini tapacaqdır.

Akademiya Kiprdəki Azərbaycan diasporunun və Rəssamlar İttifaqının dəstəyi ilə burada simpoziumlar və sərgilər təşkil etmək niyyətindədir.