KİV nümayəndələri üçün “Azərbaycan Standartlaşdırma İnstitutu”nun laboratoriyalarına mediatur təşkil olunub
Bakı, 15 dekabr, AZƏRTAC
Dekabrın 15-də İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin tabeliyində olan “Azərbaycan Metrologiya İnstitutu” (AzMİ) və “Azərbaycan Standartlaşdırma İnstitutu” publik hüquqi şəxsin laboratoriyalarına mediatur təşkil edilib.
AZƏRTAC xəbər verir ki, KİV nümayəndələri mediatur çərçivəsində laboratoriyalar haqqında ətraflı məlumat alıb, onların iş prinsipi ilə tanış olublar.
Əvvəlcə media işçiləri Metrologiya İnstitutunda İnstitutun Kalibrləmə laboratoriyası ilə tanış olublar. Məlumat verilib ki, İnstitutun əsas fəaliyyət istiqamətləri dövlət kəmiyyət vahidi etalonlarının əldə olunması (hasil edilməsi), saxlanılması və dövlət kəmiyyət vahidi etalonlarından kəmiyyət vahidlərinin ötürülməsinin, “Ölçmələrin vəhdətinin təmin edilməsi haqqında” Azərbaycan Respublikasının Qanununun müddəalarının həyata keçirilməsinin təmin edilməsidir.
Qeyd olunub ki, AzMİ 40 dan çox dövlət kəmiyyət vahidi etalonlarının saxlayıcısıdır. Bu etalonlar Temperatur, Kütlə, Elektrik, Vaxt və tezlik, Təzyiq, İonlaşdırıcı şüalanma, Sıxlıq və Özlülük kəmiyyətləri dövlət etalonları laboratoriyalarında tətbiq olunurlar.
Əlavə olaraq bildirilib ki, AzMİ tərəfindən ümumilikdə cari il ərzində 3217 təsərrüfat subyektinə xidmət göstərilib. Həmçinin 1 milyon 652 mindən çox ölçmə vasitələri və sınaq avadanlıqları yoxlanılıb, 528 ədəd dövlət kəmiyyət və kəmiyyət vahidləri etalonları kalibrlənib, daxil olan müraciətlər əsasında 223 ədəd ölçmə vasitələrinin tipi təsdiq olunaraq dövlət reyestrində qeydiyyata alınıb, 43 nəfər ixtisasartırma kurslarını bitirərək müvafiq sertifikatlarla təmin olunublar.
Qeyd olunub ki, AzMİ Ölçülər və Çəkilər üzrə Baş Konfransına (CİPM) assosiativ üzv və Beynəlxalq Qanunverici Metrologiya Təşkilatına (OIML) müxbir üzv qismində qoşularaq Azərbaycanı beynəlxalq qurumlarda da təmsil edir. Hazırda Avrasiya Ölkələrinin Dövlət Metrologiya Qurumlarının Əməkdaşlığı Təşkilatının (KOOMET) həqiqi üzvüdür. Bu əməkdaşlığın nəticəsi olaraq AzMİ-yə İSO/IEC 17025 beynəlxalq standartın tələblərinə uyğunluğunu təsdiq edən QSF-R53 nömrəli “Tanınma haqqında şəhadətnamə” verilib.
Daha sonra KİV nümayəndələri Sumqayıtda yerləşən “Azərbaycan Standartlaşdırma İnstitutu” publik hüquqi şəxsin nəzdində olan Neft-qaz və neft-kimya məhsullarının sınaq laboratoriyasında olublar.
2012-ci ildən fəaliyyət göstərən laboratoriyada 5 laboratoriya otağı - kimyəvi xassələrin təhlili, fiziki xassələrin təhlili, xromatoqrafiya, fraksiya təhlili, distillə, eləcə də nümunələrin qəbul olunması, kimyəvi maddələrin saxlanması və kimyəvi qabların yuyulması üçün otaqlar mövcuddur. Laboratoriya ən yeni texnologiya ilə istehsal edilən və beynəlxalq standartlara cavab verən 40-dan çox avadanlıq və ölçmə vasitələri ilə təchiz olunub. Sınaq laboratoriyasında normativ sənədlərə əsaslanaraq neft-qaz və neft-kimya məhsullarının (xam neft, təbii qaz, dizel yanacağı, kerosin yanacağı, benzin yanacağı, mühərrik yağları, sürtkü yağları, antifrizlər, lay suları, tullantı suları, yod, boya, emulsiyalar, yağ əsaslı laklar, tinerlər, yuyucu və ağardıcı vasitələr, sabunlar, şampunlar, dezinfeksiyaedici vasitələr, Naftalan yağları) fiziki-kimyəvi parametrləri analiz olunur.
Neft-qaz və neft-kimya məhsullarının sınaq laboratoriyasında media nümayəndələri qarşısında benzin yanacaqlarında oktan ədədinin, dizel yanacağında setan ədədinin, benzin və dizel yanacaqlarında sıxlığın, dizel yanacağında donma temperaturunun, dizel yanacağında alışma temperaturunun, yuyucu vasitələrdə aktiv maddələrin təyini olmaqla 16 sınaq keçirilib.
Daha sonra KİV nümayəndələrini maraqlandıran suallar cavablandırılıb.
Bölmənin digər xəbərləri
