Kiyevə kütləvi hava hücumu olub və 12 saat davam edib
Kiyev, 6 oktyabr, AZƏRTAC
Ukraynanın paytaxtı Kiyevə kütləvi hava hücumu olub.
AZƏRTAC xəbər verir ki, oktyabrın 5-i axşam saatlarından başlayaraq növbəti gün səhərə qədər Rusiya ordusu Kiyevə kamikadze dronları ilə hücum edib.
Kiyev Vilayət Hərbi Administrasiyasının rəhbəri Ruslan Kravçenko feysbuk səhifəsində məlumat verib ki, hava hücumundan müdafiə qüvvələri tərəfindən vurulan dronların qalıqları Kiyev vilayətinin 6 rayonu ərazisinə düşüb.
“Düşmən bizim Kiyev bölgəsinə zərbələr endirməkdə davam edir. On iki saatdan çox davam edən həyəcan təbili çalınıb”, - deyə Kravçenko qeyd edib.
Dağıntılar və xəsarət alanların olduğu barədə məlumat dəqiqləşdirilir.
Ukrayna Silahlı Qüvvələrinin Hərbi Hava Qüvvələrinin mətbuat xidmətinin yaydığı məlumata görə, oktyabrın 6-na keçən gecə Rusiya ordusu müxtəlif növ raketlərdən və hücum PUA-larından istifadə edərək Ukraynaya kütləvi hücuma keçib. Ümumilikdə Ukrayna hərbçiləri düşmənin 90-dan çox hava hədəfini aşkar edib.
Ukrayna Hərbi Hava Qüvvələri aviasiya, zenit-raket qüvvələri, elektron döyüş bölmələri və mobil atəş qruplarının köməyilə hücumu dəf edib. Döyüş nəticəsində müxtəlif bölgələrdə iki raket və 56 kamikadze PUA məhv edilib.
Kiyev
Bölmənin digər xəbərləri
