KRAL BEYNƏLXALQ ƏLAQƏLƏR İNSTİTUTUNDA SİYASI BRİFİNQ
Azərbaycan Prezidenti İlham Əliyevi institutun baş direktoru Klod Mission və digər rəsmi şəxslər böyük hörmət və ehtiramla qarşıladılar.
“Avropa Birliyi – Azərbaycan enerji və digər sahələrdə əməkdaşlıq” mövzusuna həsr olunmuş diskussiyada bir sıra ölkələrin Brüsseldə akkreditə olunmuş səfirləri, beynəlxalq təşkilatlar yanında daimi nümayəndələri, Belçikanın elm xadimləri, nüfuzlu siyasətçilər, politoloqlar, beynəlxalq təşkilatların, o cümlədən Avropa Birliyi Şurasının, Avropa Parlamentinin təmsilçiləri iştirak edirdilər.
1947-ci ildə yaradılmış və qeyri-hökumət qurumu olan Kral Beynəlxalq Əlaqələr İnstitutu Belçikanın əsas düşüncə mərkəzi sayılır, Avropa Birliyinə xüsusi diqqət yetirir, inteqrasiya, təhlükəsizlik və Yaxın Şərq məsələlərini araşdırır.
İnstitutun baş direktoru Klod Mission Azərbaycan Prezidenti İlham Əliyevə görüşə gəldiyinə görə təşəkkürünü bildirərək dedi: Çox məmnunuq ki, cavan dövlət başçısı böyük təcrübəyə, o cümlədən iqtisadiyyat sahəsində təcrübəyə malikdir.
Sonra iştirakçılara dövlətimizin başçısının tərcümeyi-halı barədə geniş məlumat verildi.
Prezident İlham Əliyev brifinqdə nitq söylədi. Dövlətimizin başçısı dəvətə görə təşəkkür etdi, Brüsseldə keçirdiyi çox səmərəli görüşlər barədə məlumat verdi, Azərbaycan ilə Avropa Birliyi arasında əməkdaşlığın gələcək inkişafı üçün təməl qoyulduğunu bildirdi. Azərbaycanın Avropaya inteqrasiyaya üstünlük verdiyini vurğulayan Prezident İlham Əliyev Ermənistanın ölkəmizə qarşı hərbi təcavüzü və onun ağır nəticələrindən də danışaraq dedi ki, müstəqilliyin ilk illərindəki böhranlı vəziyyətə baxmayaraq, Azərbaycan öz dövlətçiliyini qoruyub saxlaya, siyasi və iqtisadi islahatları həyata keçirə bildi. Bu işdə Avropa Birliyi də bizə kömək etdi.
Yeni qonşuluq siyasəti çərçivəsində Avropa Birliyi ilə əməkdaşlığın Azərbaycan üçün əhəmiyyətini vurğulayan dövlətimizin başçısı həmçinin bundan Avropa Birliyinin də fayda götürəcəyini bildirdi. Azərbaycanın açıq qapı siyasəti yürütdüyünü, xarici sərmayələr üçün əlverişli şərait yaradıldığını xatırladan Prezident İlham Əliyev iqtisadiyyatın inkişaf sürətinə görə ölkəmizin dünyada ən yüksək göstəriciyə nail olduğunu, Azərbaycanın regionda lider dövlətə çevrildiyini söylədi.
Ermənistan-Azərbaycan, Dağlıq Qarabağ münaqişəsindən ətraflı söhbət açan dövlətimizin başçısı bu məsələdə ölkəmizin ədalətli mövqeyini bir daha açıqladı. Eyni zamanda bildirdi ki, problemin həll olunmamasının əsas səbəbi Ermənistanın beynəlxalq hüquq normalarına riayət etməməsi, separatçılığı dəstəkləyən siyasət yeritməsidir.
Azərbaycan Prezidenti daha sonra brifinq iştirakçılarının müxtəlif mövzularda suallarına cavab verdi.
Prezident İlham Əliyevin Belçikaya səfəri davam edir.
Bölmənin digər xəbərləri
